Malnovā, maizneicā “Dzīles”, saimnīkoj i vysaidus gordumus taisa Aina Barsukova. Latvejā atpazeistameibu jei sajēme, pīsadolūt televizejis šovā “Īstās latvju saimnieces”, kur skateituojus puorsteidze ar sovom kulinaruom prasmem.

Kasdīnā Aina cap maizi i eistus latgalīšu kuozu tortus, sātā uzjam tyvuokus i tuoluokus gostus i tur gūdā sātys kuorteibu, senejuos tradicejis i saimis vīnuoteibu.

“Vyss bolstuos iz tradiceju,” soka saimineica Aina. “Vyss puorejais īt kluot. Maņ pateik byut drusku natradicionalai. Mes dzeivojam 21. godu symtā. Nu naēssim nu muola trauka ar kūka luošku, nu kūpejuo trauka. Mums var byut kotram sovs škeivs. Tys nav pats golvonais. Vysu var apvīnuot, i vyss izaver skaisti. Tuos pošys asuškys palīk, tī poši buļbu blīni. Maņ ruodīs, nikas nav lobuoks par buļbu blīnim.”

Idealuokais iedīņs deļ saimineicys ir svaigi captys buļbys ar bīzpīnu i suoleitu ogūrci, tok juos iedīņkartē var atrast vysai natradicionalus iedīņus. Vīns nu īcīneitim myusu dīnu iedīnim Ainai Barsukovai ir tomātu zupa ar kokosrīkstu pīnu.