28. septembrī Daugovpiļs Universitatē tyka sasaukta Satversmis sapuļce. Iz tū īsaroda 94 nu 100 bolsstīseigajim lūceklim, i atkluotā bolsojumā 79 nubolsuoja par Daugovpiļs Universitatis reorganizaceju i nūsaukuma maiņu. Raidejums “Pi myusim Latgolā” skaidroj, kaidys puormainis sagaida Latgolā leluokū augstuokuos izgleiteibys īstuodi.

Daugovpiļs Universitatis rektors Arvīds Barševskis nūruoda, ka gaidamuos puormainis ir iz lobu, partū ka tiks paplašynuoti izgleiteibys īstuodis darbeibys vierzīni. Tys studentim dūs leluokys īspiejis vuiceitīs sev interesejūšuos studeju programmuos tepat Latgolā.

Latgolā zynomi ļauds Guntis Rasims i Arņs Slobožanins pretruneigai viertej gaidamuos puormainis. Tyvojūtīs rektora pylnvaru termiņa nūslāgumam, pavasarī natyka izsludynuotys jauna rektora vieliešonys. Piec tam, kod publiskajā telpā tyka izplateita informaceja par Daugovpiļs Universitatis reorganizaceju, vairuoki Latgolā zynomi kulturys i sabīdriskī darbinīki izsacejuši pījāmumu, ka vieliešonys natyka izsludynuotys apzynuoti, lai Arvīds Barševskis varātu turpynuot sovu darbeibu rektora omotā jau kai Austrumlatvejis Universitatis rektors.

Bīdreibys “Latgolys Saeima” vaļdis prīšksādātuoja vītnīks Harijs Bernāns nūruoda, ka izvālātais jaunais nūsaukums Austrumlatvejis Universitate nav veiksmeiguokais variants, partū ka teik aizānuota latgaliskuo identitate.