Latgolu sauc par Zylū azaru zemi, eipašu uzmaneibu pīsaista Rāznys azars i tuo apleicīne. Par Latgolys jiuru dāvātais azars i tuo apleicīne vaira kai 59 000 ha plateibā veidoj Rāznys Nacionalū parku. Itys gods parkam ir zeimeigs, jū paīt 10 godi kai nu dobys parka tys palics par nacionalū parku. Par gūdu itam nūtykumam izguojuse gruomota i Rēzeknē gaidoma konfereņce. Raidejumā par tū, kai Rāznys Nacionalajā parkā vīnkūpus sadzeivoj dobys boguoteibys i cylvāku saimnīciskuo darbeiba, kur sliepās parka unikalitate, kaidys izmainis parkā nūtykušs pādejūs godu laikā, teik īsavārts ari gruomotā “Rāznas Nacionālajam parkam 10 gadu”. Gostūs Dobys aizsardzeibys puorvaļdis Latgolys regionaluos administracejis puorstuovis Anda Zeize i Aina Skredele.

Kai dzeive rit Latgolys cīmatūs, devēs nūskaidruot Laura Ieviņa. Jei gasteja Rykovā, cīmatā storp Rēzekni i Viļānim. Laura teikās ar vītejū školuotuoju, kas atkluoj vītys viesturi, folklorys kūpu, kas gatavejās Dzīšmu svātkim, i jaunū uzjiemieju-amatnīku, kurs rauga atrast sovu nišu i uzsuocs kūka rūtallītu ražuošonu.