Reigā atkluos gleznuotuoju apvīneibys V.I.V.A. izstuodi “Iemīlējušās Latgalē”
Reigā, muokslys galerejā “Museum.LV” (Andreja Pumpura īla 2), 15. novembrī 19.00 nūtiks gleznuotuoju apvīneibys V.I.V.A. (Vēsma Ušpele, Ilze Griezāne, Vija Stupāne i Agra Ritiņa) izstuodis “Iemīlējušās Latgalē…” atkluošona.
Izstuode “Iemīlējušās Latgalē…” ir stuosts par talanteigom i dzeivi mīlūšom Latgolys gleznuotuojom – Vēsmu Ušpeli, Ilzi Griezāni, Viju Stupāni, Agru Ritiņu, kuruos sasateik ik pa laikam, kab byutu kūpā, gleznuotu, daleitūs dzeivis stuostūs, boguotynuotūs cyta nu cytys i radeitu. Kotra nu muokslineicu īt nu sovys vītys Latgolā – Vēsma nu Maltys, Ilze nu Leivuona, Vija nu Aglyunys, bet Agra nu Rēzeknis. Kūpā tuos aptver vysu Latgolu. Kūpā veidoj izstuodis, kūpā pīsadola plenerūs. Vaira kai 10 godu laikā ir apbraukuotys vysaiduokys vītys, izdzeivuota rodūša kūpā byušona Latgolā, Kūrzemē, Vydzemē i Zemgalē, kotru reizi īsavuicūt koč kū jaunu i vysur viestejūt stuostu par Latgolu. Kūpeigūs izstuožu skaits jau puorsnādz divejus desmitus i dorbi ir bejuši apsaverami Latvejā, Lītovā i Vuocejā. Regulari gleznuotuoju dorbus var apsavērt Latgolys muokslinīku rudiņa izstuodēs Latgolys Kulturviesturis muzejā, Latgolys regiona muokslinīku izstuodēs Marka Rotko muokslys centrā i Jezupa Pīguožņa (1934–2014) bolvys Latvejis ainovu gleznīceibā dorbu izstuodēs.
Izstuode oktobrī beja apsaverama Latgolys muokslys i amatnīceibys centrā Leivuonā.
