Latvejis Banka (LB) šudiņ, 14. novembrī, izlaiduse Latgolai i Kūrzemei veļteitys 2 eiro pīminis monetys. 

Kai informej Latvejis Banka, ituos monetys, iz kuruom attāluoti Latgolys i Kūrzemis gierbūni, turpynoj Latvejis kulturviesturiskajim apgobolim veļteitū 2 eiro pīminis monetu sereju, kas ir vīns nu LB veļtejumim vaļsts 100 godu jubilejā. Pyrma goda tyka izlaista 2 eiro pīminis moneta ar Vydzemis gierbūni, bet vaļsts jubileja godā monetu sereju nūslēgs Zemgalei veļteita moneta.

Latvejis Banka turpynoj eipaša dizaina apgrūzeibys monetu kaļšonys tradiceju Latvejā. Sevkurai eiro zonys vaļstei ir tīseibys kotru godu emitēt div eipaša dizaina 2 eiro apgrūzeibys monetys aba pīminis monetys, kai ari vēļ vīnu pīminis monetu kaļt vairuoku eiro zonys vaļstu kūpeigys programys ītvorūs, ka taida teik organizāta.

Eiro pīminis monetys ir lykumeigs moksuošonys leidzeklis Latvejis Republikā i cytuos eiro zonys vaļstīs. Tai, sagaidūt myusu vaļsts 100 godu jubileju, pīminis monetys ar Latvejis kulturviesturiskūs apgobolu gierbūnim ceļuos pa vysu Eiropu, stuostūt par Latveju.

Jaunūs pīminis monetu nacionalūs pušu grafiskū dizainu veiduojs muokslinīks Laimuonis Šēnbergs, bet plastiskūs veiduojumus – Juoņs Strupulis. L. Šēnbergs ir Latvejis Bankys monetu dizaina komisejis prīšksādātuoja vītnīks, 19 kolekcejis monetu grafiskuo dizaina autors. J. Strupulis veiduojs grafiskū dizainu divejom, bet plastiskū veiduojumu – vairuokim desmitim LB kolekcejis i apgrūzeibys monetu.