Daugovpilī apsaverama Valdys Mežbārdis gleznu izstuode
Da 21. janvara Daugovpiļs nūvodpietnīceibys i muokslys muzejā apsaverama īvāruojamuos Daugovpiļs muokslineicys Valdys Mežbārdis gleznīceibys izstuode “Starp mirkļiem”, informej muzejs.
Izstuodē apsaverama Valdys Mežbārdis dorbu retrospektiva, kas aptver laika pūsmu nu 70. godu beigu da myusu dīnu. Apkūpuoti dorbi nu Daugovpiļs nūvodpietnīceibys i muokslys muzeja, Latvejis Muokslinīku savīneibys, Kruoslovys viesturis i muokslys muzeja kruojuma, kai ari nu muokslineicys privatuos kolekcejis.
Valda Mežbārde izstuodēs pīsadola nu 1969. goda i ir veiduojuse vaira kai 16 personalizstuodis kai Latvejā, tai ari uorzemēs.
Izstuodē “Starp mirkļiem” muokslineica pīduovoj apsavērt dorbus par juos pasauli, saimi i bārnim – par dzeivi, kurai jei dasadyuruse vysa myuža garumā. Tī paruoda sīvītis redzīni iz īkšejū i nadaudz ari iz uorejū pasauli.
Valdys dorbi vysod ir saisteiti ar Daugovpili i tuos muokslys aktivitatem. Juos gleznu audaklim ir rakstureiga kompozicionala struktura, kas ir racionala i reizem ar nadaudz paskūpu attīksmi pret kruosu.
