Kai jau kotru godu vaļsts svātku laikā, arī itūgod Latvejis vaļsts prezidents i ordiņu kapituls par seviškim nūpalnim Latvejis vaļsts lobā padeve Treju Zvaigžņu ordiņus. Ar Josifu Ročko i Andri Vaivodu, kuri tyka apbolvuoti ar Treju Zvaigžņu ordinim, sasatyka Tenis Bikovskis.

Josifs Ročko ir ilggadejs izgleiteibys i sabīdriskais darbinīks, nūvodpietnīks i muzeja “Ebreji Daugavpilī un Latgalē” dybynuotuojs i vadeituojs. Jam pīškierts 5. škirys Treju Zvaigžņu ordiņs i ordiņa kavalera tituls. Josifs Ročko beja cīši puorsteigts par tik augstu apbolvuojumu. Jis nūruoda, ka tys nav viņ juo nūpalns, partū ka, veicūt dažaidus pietejumus, jū atbaļstejuse i saime, i kolegi, i Daugovpiļs ebreju kūpīna.

Sovpus ilggadejam pošvaļdeibu darbinīkam, Leivuona nūvoda dūmis prīšksādātuojam Andram Vaivodam pīškierts 4. škirys Treju Zvaigžņu ordiņs i ordiņa viersnīka tituls. Ari Andram Vaivodam itaids apbolvuojums saguoduoja lelu puorsteigumu. Jis pastreipoj, ka tys ir vysa Leivuona nūvoda cylvāku nūpalns.