Turpynojūt sarunu cyklu ar nu Latgolys vieliešonu apgobola īvālātajim Saeimys deputatim, raidejuma “Pi myusim Latgolā” veiduotuoji itūreiz sasatyka ar Anriju Matīsu i Ivanu Ribakovu.

Anrijs Matīss 12. Saeimā īvālāts nu partejis “Vienotība” saroksta. Īprīkš jis beja satiksmis ministrs, struoduojs i Ekonomikys ministrejā, i Rēzeknis SEZ veļdē. Runojūt par dorbu Saeimā, Anrijs Matīss nūruoda, ka vīns nu leluokūs veikumu ir ceļu fonda atjaunuošona. Kai golvonū prioritati saisteibā ar Latgolu jis nūruoda napīcīšameibu uzlobuot regiona ekonomiskū stuovūkli i sakuortuot infrastrukturu, kab varātu radeit jaunys dorba vītys.

Ivans Ribakovs puorstuov parteju “Saskaņa”. Jis bejs Rēzeknes piļsātys dūmis prīšksādātuoja vītnīks, Rēzeknis 2. vydsškolys direktors, tok niu ir 12. Saeimys deputats. Ivans Ribakovs vaira komentej taišni vaļsts budžetu 2018. godam. Jis nūruoda, ka ir sovi plusi, tok jis naatbolsta lykumprojektu, kas skar taišni izgleiteibys jūmu. Runojūt par jau padarātū, Ivans Ribakovs soka, ka regulāri sasateik ar Latgolys pošvaļdeibu deputatim, tok na vysod izadūd izpiļdeit vysu, kas sūleits vālātuojim.