Raidejums sasateik ar dzejnīku i atdzejuotuoju Eināru Pelšu. Naseņ jam izguojuse pīktuo dzejis gruomota “Condom”, tū autors publicējs ar pseidonimu Demon. Eināra dzeja ni kotram varātu byut saprūtama i pījamama, sovuos radūšajuos izpausmēs jis izmontoj avangarda izteiksmis leidzekļus i spielejās ar digitalū kulturu, tekstim i grafiskajim simbolim. Pots dzejnīks soka, ka juo dzeja asūt izaicynūša i huliganiska – tī pasaruoda ari pa kaidam stypruokam vuordam.

Einārs ir cīši nūvārtāts atdzejuotuojs, nu krīvu volūdys latviski puorlics Nikolaja Gumiļova, Igora Severjanina, Mihaila Kuzmina i cytu autoru dorbus, latviski atdzejuojs ari burjatu autoru dzeju.

Einārs Pelšs vaira zynoms Reigys publikai, Latgolā jū zyna mozuok. Sovai radūšajai darbeibai Einārs nūsadevs Preiļūs. 

Raidejuma suokumā rubrikā “Kolnasātys gruomotplaukts” literats Oskars Orlovs aba Raibīs kūpā ar raidejuma producenti Vinetu Vilcāni atsaver iz 2017. godā izdūtajom latgalīšu gruomotom, skaņ ari ryndys nu Raibuo jaunuos dzejis gruomotys “PISTACEJIS”.