Nu 5. janvara da 1. februara Reigys Centralajā bibliotekā (Breiveibys īlā 49/53, 2. stuovā) byus apsaverama muokslinīka Aivja Pīzeļa gleznu izstuode “Ielu iedvesmots”, viestej informaceja bibliotekys sātyslopā.

Aivis Pīzelis dzims 1988. goda 14. decembrī Preiļūs. Latvejis Muokslys akademejā sajiems magistra grādu gleznīceibā. Sovu rodūšo darbeibu, pīsadolūt izstuodēs, suocs jau 2007. godā. Juo dorbi bejuši apsaverami i dzymtajūs Preiļūs, i cytur Latgolā – Rēzeknē, Daugovpilī, Varakļuonūs, Bolvūs, taipat ari cytur Latvejā – Mozirbē, Jelgovā, Ūzulnīkūs i, prūtams, Reigā. Aivis Pīzelis par sevi stuosta: “Es īmu nu Latgolys, nu mozys, bet meilys piļsātys – Preiļu. Puorsaceļt dzeivuot iz Reigu, beja dīzgon gryuši i napīrostai – vysys ituos cylvāku masys, namiteigai dunūšais transports i padreizynuotais dzeivis rytms ruodejuos galeigi maņ napīmāruots. Niu Reiga mani īdvasmoj, asu suocs redzēt i izjust tū sovuos Latgolys kruosuos.”

Muokslinīka Aivja Pīzeļa dorbi palīk atmiņā spūdrūs, pīsuotynuotūs kruosu dieļ, par kū pats muokslinīks soka: “Skateituoji maņ bīži prosa: “Voi tu teišom tik spūdrai redzi tuos kruosys?” Nui. Nui! Es tai jiutu! Tū kruosu izjiutu maņ Latgolys škola īvuiceja –  ka taišni tys gleznīceibā ir nūteicūšais i svareiguokais. I maņ pošam ari tai ruodīs, partū ka gleznuot koč kū fotorealisma stylā… tū jau fotokamera var izdareit. Parkū muokslinīkam byutu vysu precizai i skrupulozai juoattāloj? Muokslys aizdavums ir paust sovys sajiutys, sovu redzīni.  Kaids cyts muokslinīks varbyut vaira koncentrejās iz detaļu, iz arhitekturu i zeimiejumu, maņ tys nav eipaši svareigi. Es tū, kū doru, uztveru vaira emocionalai. Maņ vys patyktu, ka Reigā byutu vaira naskortuos dobys – kūki, kryumi, pučis, pļovys. Mežūneiga, zīdūša pļova Reigys centrā nūpļautuo maureņa vītā – tys tok byutu ekskluzivai, na tai?”