Latgolys viestnīceibā GORS 11. martā 15:00 stuņdēs nūtiks puoragri myužeibā aizguojušuos dzīduotuojis i dzīšmu autoris Aijis Erinis pīminis koncerts “Atsagrīzt”. Pasuokumā prezentēs Aijis rodūšūs dorbu izlasi-albumu. Atguodojūt dzīduotuoju, iz skotuvis Aijis dīnys prīkšvokorā tiksīs Aijis saime, draugi i kolegi, ar kurim kūpā dzīduotuoje radejuse muzyku i prīciejuse klauseituojus.

Paguojušuo goda nūgalē izguoje albums “Par martu, maiju un decembri”. Albuma kūdulu veidoj Aijis Erinis i Valda Metlāna pādejūs treis godu laikā kūpā komponātuos dzīsmis ar Ojāra Vācieša i Klāva Elsberga dzeju, kai ari pošys Aijis tekstim. Martā gaidoms jauns albums.

Myužeibā Aija aizguoje 2017. goda 17. julī. Aija muzicēja kūpā ar saimi, ari kai solomuokslineica, izpyldūt i sovys originalkompozicejis, i ari tāva dzīsminīka Andra Eriņa sacerātuos dzīsmis. Zynomuokuos Aijis Erinis izpiļdeituos dzīsmis beja “Vysa pyrma”, “Oki, nalej, leiteņ”, “Sakura”, “Trešā maija dziesmiņa” i cytys.