Portals Lakuga.lv klivs par medeju

Portals Lakuga.lv klivs par medeju

Latgaliski rokstūšajam “Latgalīšu kulturys ziņu portalam lakuga.lv” niu ir medeja statuss, leidz ar tū tys ir vīneigais plošsazinis leidzeklis, kura saturs teik veiduots tikai latgalīšu rokstu volūdā.

Portals lakuga.lv dorbojās jau nu 2007. goda, bet 2018. goda janvarī tys sajēme oficialu medeja statusu, i niu tys ir “Latgalīšu kulturys ziņu portals lakuga.lv”. Tymā vīnuvīt bez moksys sajamama jaunuokuo informaceja par Latgolys i latgaliskuos kulturys aktualitatem, portals palics par sova veida Latgolys vizeitkarti. Sovim skaiteituojim lakuga.lv pīduovoj īsapazeit ar jaunuokajim dorbim latgalīšu literaturā i muzykā, rokstus par Latgolys viesturi i latgalīšu volūdu, intervejis ar sabīdreibā zynomim latgalīšim i c.

“Verūtīs ar skotu nuokūtnē i apsazynojūt, ka sabīdreibā pīaug interese par latgaliskū kulturu i latgalīšu volūdu, nūlēmem spert nuokušū sūli i byut par medeju. Lakuga.lv ir cīši lela nūzeime latgalīšu rokstu volūdys saglobuošonā i volūdys prestiža ceļšonā, ar sovu darbeibu mes aplīcynojam – latgalīšu volūda nav tikai sātys volūda, tei ir lītojama medejūs. Prīca, ka myusu dorbs teik nūvārtāts i projektu konkursūs sajamam Vaļsts kulturkapitala fonda finansiejumu, kas ļaun nūdrūsynuot portala darbeibu. Jaunais statuss ari mums pošim izlīk lelu atbiļdeibu byut vēļ interesantuokim, daudzveideiguokim i radūšuokim,” soka portala redaktore Vineta Vilcāne.

2017. goda majā nūtykušajā 4. pasauļa latgalīšu saītā (Latgolys symtgadis kongresā) Latgolys sabīdreiba izsaceja vielmi piec plašuoka latgalīšu volūdys lītuojuma medejūs, lakuga.lv ir vīns nu nadaudzajim, kas var tū nūdrūsynuot.

Kulturys ziņu portalu lakuga.lv uztur bīdreiba “Latgolys Studentu centrs”, kurai ir daudzu godu pīredze latgalīšu rokstu volūdys saglobuošonā i populariziešonā, eistynojūt cytus latgaliskuos kulturys projektus. 2017. godā portala lakuga.lv īguļdejumu latgalīšu volūdys populariziešonā nūviertēja, pīškirūt Latgalīšu kulturys goda bolvu “Boņuks”.

Lakuga.lv jaunumim var sekuot leidza socialajūs teiklūs facebook.com/LaKuGa.lv, twitter.com/LaKuGa i draugiem.lv/lakuga.lv.

Print Friendly, PDF & Email

Komentari

  1. “Plošsazinis leidzeklis” vīnā vuordā – viesteitivs. “Lakuga” ir latgaliski rokstūšs viesteitivs.

Nūtikšonu kalendars

May
17
Ūtr
15:00 Maja dzīduojumi pi krysta @ Ūzulainis krysts
Maja dzīduojumi pi krysta @ Ūzulainis krysts
May 17 @ 15:00 – 16:00
Maja dzīduojumi Dīvmuotis gūdam kūpā ar Ūzulainis Tautys noma folklorys kūpu “Zeiļa”.
16:00 Maja dzīduojumi pi krysta @ Pleikšņu krysts
Maja dzīduojumi pi krysta @ Pleikšņu krysts
May 17 @ 16:00 – 17:00
Maja dzīduojumi Dīvmuotis gūdam kūpā ar Ūzulainis Tautys noma folklorys kūpu “Zeiļa”.
May
18
Tre
15:00 Lienītis Slišānis izstuodis “Uzd... @ Latvejis Nacionaluo teatra Jaunuo zale
Lienītis Slišānis izstuodis “Uzd... @ Latvejis Nacionaluo teatra Jaunuo zale
May 18 @ 15:00 – 16:30
Nu 10. maja Latvejis Nacionaluo teatra Jaunajā zalē apsaverama Lienītis Slišānis izstuode “Uzdevums”. Izstuodi īspiejams apmeklēt stuņdi pyrma izruožu suokuma i izruožu laikā. Lienīte Slišāne ir gaismu muokslineica i 2020. goda beiguos sajēme “Spēlmaņu nakts”[...]