Grupa “Bez PVN” publiciejuse sovu jaunuokū veikumu – video klipu dzīsmei “Eņgeli sviļpoj”.

Par dzīsmi grupa soka: “Dzīsme ir veļtejums myusu meilīm – tīm, kas ir jau “tī augšā”. Eņgelim. Jī myusim beja, a mes sev asom tān i ite. Nadzeivuosim paguotnī, voi tikai nuokūtnī, bet gon niu i ite. Byusim poši sev i vīns ūtram. Darēsim tai kai gribīs, navys tai kai vāga. Audzynuosim sovus bārnus, mīļuosim i elpuosim! Byusim! Naatkareigi nu vacuma, apstuokļu nostys i laiceibys grūžu. Viņ myusu eņgeli myusim byus sūpluok vysod, leidz kaidu dīnu i mes poši sviļpuosim jīm leidza..”

Pārn novembrī piec ilguoka puortraukuma grupa fanu viertiejumam nūdeve video klipu dzīsmei “Golds iz ustobys”. Dzīsme “Golds iz ustobys” nomināta Latgalīšu kulturys goda bolvai “Boņuks”.

Dzīsmis vuordi

Atstuots tev lidoj mīrs
Tu jū redzi, viņ nadzierdi
Atstuots tev pleist laimis sīts
Tu jū dzierdi, viņ najiuti..

Laiks myusus saliks pa vītom
Myužeiba goram na lītom
Tovys rūkys dzeivi maņ virpoj..

A, eņgeli dabasūs sviļpoj,
Muni eņgeli sviļpoj..

Apleik tev smuordoj sīns
Tovs dzeds jū pļuove, savuoksi tu
Apleik tev dzymst jaunys sirds
Tovs bārns elpoj – reitdīnys TU

Laiks myusus saliks pa vītom
Myužeiba goram na lītom
Tovys rūkys dzeivi maņ virpoj..

Eņgeli dabasūs sviļpoj,
Muni eņgeli sviļpoj..