Decembrī izguoje latgalīšu dzejneicys Ingrīdys Tāraudys catūrtais dzejūļu kruojums “Pērlītes zem kājām/Bisers zam kuoju”. 10. martā Tulovā (Tullow) Īrejā nūtiks ituo dzejis kruojuma prezentaceja. Kruojumā dzejūli ir gon latgalīšu, gon latvīšu literarajā volūdā.

Ingrīda Tārauda stuosta, ka gruomotys nūsaukums bejs izdūmuots jau godus desmit, bet tam “apakšā” asūšī dzejūli tyka īprīkšejā kruojumā “Boltais šokolads” (2012), bet daži – par biseri – beja aizagivuši nikur napublicāti i pyrma pīcu godu suoce apaugt ar cytim dzejūlim, cikom beigbeiguos “Bisers..” tyka da logiska iznuokuma. “Dūmoju, ka sovu stilu laika gaitā i sovu “ingridismu” naasu pagaisynuojuse, par tū, saprūtams, sprīss skaiteituojs,” soka Ingrīda.

“Gruomotys izdūšonys ceļš nabeja vīgls – sponsori, konkursi i tamleidzeigai, vyss beidzēs dreižuok kai izdūmuoju, bet gruomotai beja juoizīt taišni itymā laikā, kab paspātu pasaceit paļdis munim vystyvuokajim – eipaši munai pyrmajai vyslaiku kritikei – mamai. Jei sagaideja itū gruomateņu!” par gruomotys izdūšonu atkluoj autore.

Ingrīdys niulinejuo dzeivis vīta ir Īreja, partū tī ari nūtiks gruomotys prezentaceja. Suokums 17.00 stuņdēs Tulovā (Tullow Forward Steps Resourse Centre, Chapel Lane, Tullow).

Ar dzejūlim nu kruojuma “Pērlītes zem kājām/Bisers zam kuoju” var īsapazeit rokstā DZEJA. Tāraudu Ingrida: “..ka var byut i tai”.