Latgolys namaterialais kulturys montuojums: psaļmu dzīduošona Zīmeļlatgolā

Latgolys namaterialais kulturys montuojums: psaļmu dzīduošona Zīmeļlatgolā

Nūslādzūšajā rubrikys “Latgolys namaterialais kulturys montuojums” rokstā par psaļmu dzīduošonu Zīmeļlatgolā. Kūpumā Namaterialuo kulturys montuojuma sarokstā īkļautys četrys vierteibys nu Latgolys.

Psaļmis, saļmis aba myrušūs oficejs ir daļa nu bēru tradicejis Latgolā. Praksis pastuoviešonys pamatā ir atziņa, ka myrušūs dvēselem ir vajadzeiga lyugšona, kas atvīgluotu aizguojieja cīsšonys škeisteitovā. Itei tradiceja Latgolā pastuov jau nu 18. godu symta i ir saisteita ar jezuitu darbeibu. Myusu dīnuos psaļmu dzīduošona nūteik bez bazneickunga leidzdaleibys. Namaterialuo kulturys montuojuma sarokstā īkļauta psaļmu dzīduošona Zīmeļlatgolā, konkreti Bolvu, Baļtinovys, Ruguoju i Vileks nūvodūs, i ari muryšūs oficeja (saļmu) dzīduošona Vabalis i Leiksnys pogostūs.

Psaļmis ir aptuveni pusūtru ci divejis stuņdis garys dzīduotys lyugšonys, kū izpylda golvonūkuort sātā. Dzīd nu lyugšonu gruomotu, kuruos ir publicāts tikai teksts. Melodejis i dzīduošonys veidu puormontoj nu paaudzis paaudzē mutiskā ceļā i dzīsmis dzīd “nu golvys”. Pīredziejušuokys dzīduotuojis nareši nu golvys izpylda ari tekstu, nasaverūt iz tuo lelū apjūmu, bet dzīšmu gruomotys vysleidza tur prīškā, partū ka tū prosa tradiceja.

Sātys apstuokļūs psaļmu dzīduošona parosti nūteik dzeivojamajā ustobā pi golda, kas kluots ar boltu lynu goldautu. Iz golda stuov aizdagta svece i krucifikss, bīži tim blokus nūlykti ari sātys svieteibys simboli – rupmaize i suoļs. Dzīduošonu suoc i voda golvonuo dzīduotuoja aba prīkšdzīduotuoja, kurai pīsavīnoj puorejuos dzīduotuojis. Vairuokūs gadīņūs ir divejis dzīduotuoju grupys i attīceigi – divejis prīkšdzīduotuojis. Itaidūs gadīņūs obejis grupys dzīd puormaiņus. Parosti dzīduotuoju grupā ir pīcys ci sešys dzīduotuojis. Myusu dīnuos Zīmeļlatgolā psaļmis dzīd ari Tautys nomūs, bibliotekuos, muzejūs i cytuos itam nūlyukam pošvaļdeibu atvālātuos telpuos. Ari 21. g. s. suokuos psaļmu dzīduojumi ir byutiska Latgolys katuoļu gareiguos dzeivis sastuovdaļa, kas veidoj trauslū saikni storp dzeivajim i myužeibā aizguojušajim. Psaļmu dzīduošonys tradiceju Zīmeļlatgolā Namaterialuo kulturys montuojuma sarokstam pīsaceja Bolvu nūvoda pošvaļdeiba.

Laika gaitā Namaterialuo kulturys montuojuma saroksts tiks papyldynuots – leidz 29. juņam turpynojās 2018. goda dasacejumu pījimšona. Sarokstam sevkurs var dasaceit elementus, kas skaitomi par vaļsts aizsorgojamu namaterialuo kulturys montuojuma vierteibu i kuru īkļaušonai sarokstā ir plašs attīceiguos kūpīnys atbolsts i leidzdaleiba. Vaira informacejis var atrast  lnkc.gov.lv.

Roksta sagataveišonā izmontuota Rutys Cibulis sagataveituo informaceja, karteite.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]