Rēzeknē
12.03.2018.

NEPL Padūmei
LR Saeimys frakcejom,
Plošsazinis leidzeklim

Par NEPLP finansējuma samazinājumu raidījumiem latgaliešu valodā.

Kai līcynoj Nacionaluos elektroniskūs plošsazinis leidzekļu padūmis (NEPLP) 8. marta sēdē apstyprynuotī konkursu nūlykumi “Par raidījumu veidošanu latviešu un mazākumtautības valodās 2018.gadā Latgales reģionālajos un vietējos plašsaziņas līdzekļos”, itūgod raidejumu veiduošonai latgalīšu volūdā paradzāts par 20 000 eiro mozuok nakai 2017. godā.

Jamūt vārā, ka konkursa finansiejumu veidoj leidzekli, kas NEPLP pīškierti sabīdreibys salīdiešonys, nacionaluos identitatis i vaļsts volūdys pozicejis nūstyprynuošonys pasuokumu ītvorūs, bīdreiba “Latgolys Saeima” pauž naizpratni par lāmumu daļu leidzekļu nūvirzeit raidejumu veiduošonai mozuokumtauteibu volūduos.

Da šam NEPLP 71 142 eiro godā konkursa kuortā nūvirzeja satura veiduošonai TV raidejumim latgalīšu volūdā, kai pīmāram, “Sajūti Latgali”, “Latgolys rūbežys vaicojūt”, “Spīgeļs”, “Netradicionālā Latgale”, “Pa sovam” i c., kai ari radejis raidejuma “Pi myusim Latgolā” veiduošonai.

Bīdreiba “Latgolys Saeima” nūruoda, ka lai gon Vaļsts volūdys lykums uzlīk par pīnuokumu vaļstei nūdrūsynuot “latgaliešu rakstu valodas kā vēsturiska latviešu valodas paveida saglabāšanu, aizsardzību un attīstību”, finansiejuma samazynuošona raidejumim latgalīšu volūdā ir sūļs atpakaļ lykuma īdzeivynuošonā.

Latgolys sabīdriskuos organizacejis ir ari vairuokkuort nūruodejušs, ka napīcīšams nūsaceit konkreti īzeimātu procentu raidejumim latgalīšu volūdā nu vaļsts dotacejis, kas paradzāta sabīdriskuo pasyutejuma izpiļdei Latvejis Radejā, LTV i komercialajim medejim. Itei iniciativa da šam nu NEPLP pusis nav givuse atsauceibu.

Bīdreibys “Latgolys Saeima” volda prīkšsādātuojs
Guntis Rasims