Rēzeknis teatrī “Joriks” īstudāta vīncielīņa bierneibys kolaža piec Annys Brigaderis autobiografiskuo romana motivim – “Dievs. Daba. Darbs”. Pyrmizruode nūtiks 27.martā 18.00 stuņdēs.

Īstudiejuma režisors Edgars Niklasons uzsver, ka Annys Brigaderis autobiografiskuos trilogejis pyrmuo daļa “Dievs. Daba. Darbs” ir kai pametnīks, autoris veļtejums saimei, kas jū izaudzynuoje par izcylu Latvejis kulturys personeibu. Režisors, kas ir ari dramatizejuma autors, atkluoj, ka izruodis topšonys laikā tyka analizeiti ari cyti Annys Brigaderis dorbi, pīzeimis, publikacejis i tt., vaicojūt cālūņsakareibys, kas nūsoka individa izaugsmi i saikni ar juo radeituojim.

Īstudiejums “Dievs. Daba. Darbs” ir pīaugšonys stuosts, bierneibys atmiņu uzplaiksnejums, kurā bārns rauga pīraksteit sevi pylnu ar prīcu, bādom i vysu tū, kas juo pasauli padora bogotu i interesantu. Izruodē sadzeivoj plana, objektu i susātivu estetika, daškirūt kotrai ainai atškireigu formu i atmosferu.

Annele ir kolpu saimis jaunuokais bārns, zynuotkuora meitine, kas rauga īsaderēt lelūs pasaulī. Kotru dīnu jei rauga atrast vareibu byut sūpluok muotei, tāvam, babai i muosai Līzeņai, tok dorbs jūs tur sovā giustā, līkūt Annelei justīs vīntuļai i atstumtai. Kotru reizi, kod meitine koč kū prosa dzymdynuotuojim, jei preteimā sajam smogu nūpyutu i bezpaleidzeigu “Ei, nu, ei, mulkeite!”. Annele nav nikaida mulkeite, jei gryb zynuot i saprast, i, ja lelī naatbiļd iz juos vaicuojumim, tod atbiļdis juovaicoj pošai.