Roksta autore: Ilga Šuplinska, nūvodvuiceibys nūrisis koordinatore

Latgalīšu navaļstyskuos organizacejis sovā aicynuojumā 27. aprelī svinēt Latgolys kongresa dīnu i runuot latgaliski aicynuoja syuteit ari ituos dīnys pīredzis stuostus. Sajimti ir četri stuostejumi par ituos dīnys nūtykumim Maltys Bārnu i jaunīšu centrā, Dagdys vydsškolā, Galānu pamatskolā i Viļānu vydsškolā.

Prūtams, uzadrūšynuot latgaliski runuot školā stuņdēs jau ir sūļs pretim senču volūdai i dzeivisziņai, tok vēļ raksteit latgaliski, tī vajag na tik drūsmi, bet ari styngru apziņu, ka latgalīšu volūdys izkūpšonys dorbs tiks turpynuots i ka atseviškis klaidys, kū pamanies zynūšs skaiteituojs, jū nanūbaidēs izteikt sovys izjiutys latgaliski.

Itamā reizē divu školu puorstuovi uzadreikstēja sovu pīredzi paust latgaliski. Prīca par Viļānu 11. klasis školneicu Martu Puzāku i Roberta Mūka muzeja izveiduotuoju, ilggadeju latvīšu volūdys i literaturys školuotuoju i latgaliskūs lītu dareituoju Martu Binduku. Nu jau pensioneituo školuotuoja Marta atrūn laiku byut školā i rūsynuot bārnus radušam dorbam. Partū Galānu školā na tik uzzynuoja par Latgolys dīnu, īsavēra gruomotā „Mozais priņcs”, bet ari klausejuos stuostu par Galānu pusis atjaunuotū tautystārpu, teikys i nūstuostus, kas savuokti par ituos pusis cīmim i upu i cytu geografiskūs objektu nūsaukumim. Tok, svareiguokais, školāni raudzeja poši pīduovuot sovus nūstuostu variantus par apleicīnis vītu vuordim.

Sovom kuortom Marta Puzāka daluos sovā atziņā, ka stuņdis latgalīšu volūdā par temom, kas ir saisteitys ar latgaliskū, ir vajadzeigys. I, īspiejams, tuos varātu byut ari bīžuok.

Baltic Travelnews školuotuojai Martai duovynoj īspieju gordai gasteišonai Reigā, bet vydsškoļneicai Martai – iudiņa prīcu Venstpilī 4 personom!