Nu 6. leidz 17.augustam Rēzeknis Tehnologeju akademejā Rēzeknē nūtiks radūši aktiva bārnu i pusaudžu dīnys nūmetne “Sūpluok”, kuru vadeis dažaidi sabīdreibā pazeistami cylvāki.

Vosorys nūmetnis mierkis ir radeit platformu latgaliski latviskuos ideņtitatis styprynuošonai i latgalīšu rokstu volūdys apgivei vosorys periodā, dažaiduos aktivitatēs īsaistūt 10–14 godus vacus bārnus i pusaudžus. Nūmetnis dalinīkim tiks pīduovuotys vysaidys radūšuos aktivitatis. Pīmāram, byus vareiba kūpeigim spākim radeit i prezenteit animacejis filmu “Mana Latvija”, izspielēt i radeit puorsokys, pīsadaleit latgaliskajā Večerynkā i sasarunuot par latgaliskū i aktualū.
Leluokuo daļa nūdarbeibu nūtiks latgalīšu rokstu volūdā voi bilingvali. Nūmetnis laikā byus vairuoki pasuokumi, kurūs vareis īsasaisteit ari cyti nūmetnis dalinīku vacumpūsma bārni i nūmetnis dalinīku vacuoki.

Pīsasaceišona nūmetnei ir leidz 1.juņam. Vītu skaits īrūbežuots. Leidzmoksojums par daleibu nūmetnē ir 90 voi 110 euro, atkareibā nu tuo, voi leidzmoksuojums ir veikts laiceigi. Nūmetni organizej Latgalīšu kulturys bīdreiba sadarbeibā ar Rēzeknis Tehnologeju akademeju.

Pīsasaceišona i vaira informacejis facebook.com/supluok, nūmetnis programa facebook.com/events.

Viests sagataveita piec nūmetnis organizatoru snāgtuos informacejis. Karteite: publicitatis materials.