2017.goda decembrī izguoja Ingridys Tāraudys bilingvalais dzejūļu kruojums “Pērlītes zem kājām/Bisers zam kuoju”. Niu jei struodoj pi jaunys gruomotys “Pajautys”. 

***
varažoj burti burti varažoj
boltys burys viejoj viejūs
mani turi vari turi
verīs redzi saredzi
klausīs dzierdi sadzierdi

—

pylda sirdi atsazeišona
tovu sūļu skaniešona
skannnn skan nn
lopa givuse breiveibu
aizlidoj prūjom

***
sameiļuojumam aizvokora
tvierīņs piersti nūguruši
atsalaiž
atsalaiž
palaiž
lidoj muna rogona lidoj
nakšuma dabasūs
lai dzierksteļoj slūta
kai petarde
rogonys atpakaļ naatlidoj
ka palaidi…

***
nikas nu tuo kam apleik apīts
i paīts garom
cigariškys renēs
lampys dyumūs
bolūžu gulgys iz jumtu
kas puori itam nakšumam
opols kai blins
mieness
melneigsneigi muokuli
izagulst jam viersā

***
aiz tuos pamalis
zyls tuolums
i napabeidzami sapyni
vylta līsmenis
tovuos acīs
meditaceju breinums
zalts

tyvojās snīdziņu laiks

***
caurspeideigys pret sauli
kūku lopys kai tientenis
mozs zierneklis
lylā teimeklī
jurgiņu izmysušais
dagums
pret rudini
ceļam pa vydu
tuolumā
aizavej bolta streipe
nazyni vaira
kur tova
mīra sola

***
..stileigs i šmuks
i jauna žaketka
rudiņa kruosuos
a es pa leita plančkom
bez kūrpeišu
seikgrumbenis ap acim doncoj
piļsātys autobusi ari
rudiņa kruosuos
par kū vyspuor vajag
īraudzeit sevi spīgelī

***
tyltam puori aizdipinej
smaileigi

nu naatsaver atpakaļ
jis soka

tylti naaizadag
poši nu seve

iz tuos afišys
jau cyta kina

***
dzeisleņa tova pi munys
kab napasamūstu

tai labi i svešvuordi traucej
nūkruosu kaitys

viejā pleivinej buolgons
zaļums aiz lūga

susātivi iz tovys mugorys
a tod īsasmej čāpuks

***
pa reitim pa vokorim
nu juo kai polūs upe
vuordi vuordi
pats sadūmoj pats ailinej
i zemneicys savārtys
iz smylgys
Latgolys pļovuos
veipotku treisuļuojums
vuordi vuordi
kod klusums – tod jis ir prūjom
muns cylvāks
kam svešaida apstuosme
pasauļs pi kuoju
bučoj mani

***
kors iz daksteņjumta
palākspuornains
nūstīptī elektreibys vodi
gaisa kontroļam sajaukti pīroksti
akmisteņu šnierksti zam kuoju
a sīvīti vajag meiļuot
labi ka par daudz
ir pasaceiti vuordi kas
pazyud pa vīnam
perlys i šampanīts
palete pret flīzem
muna pādejuo breivuo
trolejbusā
lai kors iz daksteņjumta natraucātu

***
agrā reitā
purpiniešu i varažuošu
pīdūd i atslēdz

pajautu skaiteituojs
rudiņa lopu
kataklizma

dzaltona sumka
ar izprinteitom viestulem
kod plandejūt vakarnaktei
aizeimu nu teve

***
ciparu kombinaceja
adresats nasasnādzams
kai aizaeļss kolnā kuopiejs
patmaļu čeikstīni
Reita vieja dzīmis Mežarūzei
kaitu viļcīņa apstuosme
storp a i b
myusu pusvuordus nūslēps
skaudeiguo

izmet sausrūzeitis
kas nu koč kod pi aizkoru
lyuškom

***
vātra dabasūs
dzeivuotgriba kai bulta
puorcierte tymsu

***
smolkys mežginis
rūžu lopys iz slīžu
navajag apstuot

***
satymsnuo nakts
besakūkā laimis daudz
meditaceja

***
vaļā dabasi
suleigi uobeli byukš
tovi pādi ite

***
kreit šlivu boltums
pagluob zaļmaiguo zuole
tauryna elpu

***
otkon tuļpis zīd
nu zebonkys izbyra
pārnejuos biļdis

Karteite nu momenti.lv