Nu nuokušuos nedelis televizejis kanalūs RE:TV i TV24 suoks translēt jaunu desmit raidejumu cyklu “Sūpluok Latgolai”, infomej raidejuma vadeituoja Ausma Sprukte. Raidejums “Sūpluok Latgolai” stuosteis par Latgolys regiona cylvākim, par aktualū i nūteikūšū taišni ite i niu, tū veiduos SIA “Latgales reģionālā televīzija”.

Desmit raidejumūs tiks skateitys piļneigi sovā storpā nasaisteitys i atšķireigys temys, suokūt ar arhiteturu i viesturi leidz pat lauksaimnīceibai, muzykai i jaunuokajom inovacejom.

Raidejuma golvonuo ideja ir byut “sūpluok” aba blokus/tyvuok gon raidejuma vorūnim, gon skateituojim, atkluoj A. Sprukte.

Kotrā nu raidejumu izvālātī temati tiks ruodeiti nu diveju skotupunktu, pīmāram, pyrmajā raidejumā tik atkluots, kai ar Preiļu piļs atjaunuošonu i viesturis nūslāpumu izzynuošonu veicās pošvaļdeibai, i, cik daudz dorba i pyuļu Arendolis muižys atdzimšonā Vuorkovys nūvodā īguļdiejuse Turlaju saime. Raidejums skanēs latgalīšu volūdā, tai saglobojūt i popularizejūt volūdu na tikai Latgolā, bet ari vysā Latvejā.

Pyrmū “Sūpluok Latgolai” raidejumu varēs nūsavērt jau 5. junī kanalā RE:TV pl. 21:00 i kanalā TV24 6. junī pl. 16:00. Nuokušajā dīnā raidejums varēs nūsavērt ari internetā.