Piec Dzīšmu i deju svātkim, 9. julī, Latvejis Universitatis Humanitarūs zynuotņu fakultatis folkloristikys nūzaris pietnīki i folklorā īinteresāti studenti profesoris Janinys Kursītis vadeibā dūsīs tradicionaluos kulturys i mutvuordu viesturis ekspedicejā iz Latgolu – Leivuonu i Preiļu nūvodim, līcynoj informaceja Latvejis Universitatis sātys lopā. Ituo goda ekspedicejai dūts nūsaukums “Pa Preiļu rajona pēdām”, jo tuos mierkis ir apsekuot daļu nu bejušuo Preiļu rajona.

Itūgod nu 9. leidz 13. juļam ekspedicejis dalinīki dorbuosīs Preiļu nūvoda Saunys pogostā i Leivuonu nūvoda Turku pogostā, kas izsenis pazeistams ar sovom folklorys kūpu tradicejom. Preiļu nūvoda Saunys pogosta etnografiskais ansamblis “Naktineica” ir vīns nu pyrmajim folklorys kolektivim Latvejā, kas oficiali sovu darbeibu suocs jau 1953. godā.

Folklorys ekspediceju dalinīkus interesej na tikai folklorys tradiceju kūpieji, bet sevkurs itūs pogostu īdzeivuotuojs, kam tyvys kaidys tradicionaluos prasmis, gūdu saimineicys, latviskūs īražu, ticiejumu i nūstuostu zynuotuoji ci vīnkuorši leli stuostnīki ar bogotu i raibu dzeivis pīredzi. Ekspedicejā Latvejis Universitatis pietnīku grupai pīsavīnuos Reigys Muokslys i medeju tehnikuma tūpūšī videooperatori, kab video sižetūs fiksātu ekspedicejis gaitu.

Vysys pīraksteituos intervejis piec ekspedicejis nūdūs globuošonai Latvejis Universitatis Nacionalajā Mutvuordu viesturis arhivā.

“Ja labi veiksīs (iz kū cīši ceram), nuokamgod ekspediceju itymūs pogostūs atkuortuosim, kab piec divu godu dorba varātu sagataveit gruomotu,” soka ekspedicejis koordinatore Jolanta Stauga.

Īprīkšejūs godūs pietnīki i studenti pabejušs ari cytūs Latgolys nūvodūs – Dagdys, Daugovpiļs, Kuorsovys i Vuorkovys nūvodūs. Bolstūtīs iz ekspediceju materialu, itūšaļt sagataveišonā ir rokstu kruojums “Daugavpils novads: vietas vērtība”.