Myusdīnu muokslys galereja nu 14. leidz 19. juļam Leivuonūs organizej pasuokumu cyklu “Skatuves mākslas laboratorijas”, pīduovuojūt bezmoksys pasuokumus ar mierki radeit prīkšstotu par myusdīnu skotivis muokslys formom, virzīnim i aktualitatem, kai ari veicynuot jaunradis procesu atteisteibu.

Pasuokumi itymā nūtykumu cyklā tiks veiduoti kai eksperimentalys “laboratorejis” – atsakuopūt nu zynomom normom i tradicejom, ļaunūt eksperimentēt, ļautīs nazynomajam nasekojūt jau zynomom nūruodem i vadlinejom.

Daleiba vysuos aktivitatēs ir bez moksys. Daleiba pasuokumu cykla meistardarbneicuos tikai ar īprīkšeju pīsateikšonu, bet pogolma izruodis, koncerts i sajiutu teatra izruode byus pīejama sevkuram interesentam i bez īprīkšejis pīsasaceišonys.

14. julī nūtiks pogolmu teatra izruodis bārnim “Nāc laukā!” (rež.K.Krūmiņš) – pl.13:00 pogolmā storp daudzdzeivūkļu sātom Biedrības īlā nr. 3 i 5 i pl.16.00 pogolmā storp daudzdzeivūkļu sātom Vecticībnieku īlā (pi stadiona).

Aicynuoti bārni i jūs saimis, izruodis – bez moksys! Izruodē byus stuosts par dzeivi pogolmā pyrms interneta, i par dzeivi pogolmā šudiņ. Par nadorbim i cālsirdeibu, par kautinim i pyrmū mīlesteibu, par izruodi stuosta vīns nu veiduotuoju, aktirs i režisors Kārlis Krūmiņš.

17. julī Myusdīnu muokslys galerejā nūtiks divys Reigys cyrka školys meistardarbneicys. Pl.16:00 galerejis telpuos (Rīgas īlā 108a) nūtiks “Rīgas cirka skolas darbnīca”, kurā aicynuoti pīsadaleit bārni vacumā nu 8 leidz 12 godu. Darbneicuos dalinīkim byus īspieja atteisteit sovu fiziskū sagataveibu i vīnlaiceigi īpazeit dažaidys cyrka disciplinys. Tū vadeis divi pasnīdzieji, ļaujūt īpazeit dažaidys cyrka rūtalis, kas veicynuos izpratni par cyrka muokslu, vuiceis atteisteit veikleibu, skotivis kluotbyutni i sadarbeibu. Sovukuort pl. 18.30 galerejā nūtiks “Žonglēšanas meistardarbnīca”, kurā gon bārnim, gon pīaugušajim byus īspieja apgiut žongliešonu ar skustenim i bumbeņom. Daleiba darbneicuos tikai ar īprīkšeju pīsateikšonu, rokstūt iz vindule.lasma@gmail.com.

18. julī Myusdīnu muokslys galerejā gasteis vīns nu pazeistamuokūs Latvejis repa muziku – ansis, vodūt Leivuonu jaunīšim repa meistarklasi i vāluok snīdzūt bezmoksys koncertu laukumā pi galerejis. Meistarklasis mierkis ir atteisteit Leivuonu jaunīšūs radūšuos i skotuvis muokslys prasmis, i tymuos ansis dalinīkus īpazeistynuos ar teksta i vokola nūzeimi repa muzykā, tehniku, ritmiskū zeimiejumu i cytim izteiksmis leidzeklim repa muzykā. Meistarklase nūtiks pl. 17.00 galerejis telpuos (Rīgas īla 108a), daleiba meistarklasē – tikai īprīkš pīsasokūt, rokstūt iz vindule.lasma@gmail.com. Sovukuort koncerts nūtiks pl. 20.00 laukumā pi galerejis, iz tū aicynuoti vysi interesenti.

Nu 16. leidz 19. juļam galerejā nūtiks “Sajūtu laboratorija” aba sajiutu teatra meistardarbneica režisoris Lienys Šmukstes vadeibā ar meistardarbneicys nūslāgumu – izruodi 19. juļa vokorā.

Meistardarbneicys dalinīki četrys dīnys struoduos laboratorejā, pieteis dažaidys manis i darbneicys rezultatā poši veiduos cytim apmaklātuojim pīejamu izruodi. Režisoris radeituos muokslinīciskuos vīzejis pamatā ir mierkis atteisteit teatra izteiksmis leidzekļus, veidojūt laboratoreju (eksperimentalu vidi), kur golvonuo lūma atvālāta cylvāku sajiutom, i radeit laikmeteigu muokslys dorbu i izstruoduot radūšū platformu kasgadejom eksperimentalom teatra laboratorejom. Daleiba Lienys Šmukstes vadeitajā meistardarbneicā juopīsoka leidz 10. juļam, rokstūt iz liena.smukste@gmail.com.

19. juļa vokorā sevkurs interesents kai skateituojs i dalinīks varēs apmeklēt izruodi – sajiutu teatra ceļuojumu pusstuņdis garumā. Izruode nūtiks vairuokys reizis: pl.17:30, pl.18:15, pl.19:00, pl.19:45, pl.20:30. Daleiba īprīkš nav juopīsoka (izjamūt gadīņus, ja izruodi planavoj apmeklēt grupa vaira par 10 cylvāku). Īeja – bez moksys. Izruode nūtiks galerejis telpuos Rīgas īla 108a.

Viests sagataveita piec organizatoru snāgtuos informacejis.