Rokstu sagataveja: portals lakuga.lv

Gitaru meistars ir muzikis Juoņs Kuzminskis kūpā ar dūmubīdrim uzsuocs dorbu pi komedejkinys “Lombards” uzjimšonys. Kinys nūtykumi rysynuosīs Latvejis pīrūbežā, atkluojūt parostūs ļaužu dzeivi dzanūtīs piec kaida nūslāpumaina čemodana, aktiru lūmā īsajuss Latgolys kulturys dzeivē zynomi ļauds i muziki, portalam lakuga.lv atkluoj kinys idejis autors J. Kuzminskis.

Kinys “Lombards” golvonais mierkis ir popularizēt latgalīšu muzyku, i tymā leluokūtīs filmēsīs latgalīšu muziki, kuru radeituo i izpiļdeituo muzyka ari tymā skanēs. Komedejis uzjimšona nūteik ar pošu spākim i par sovim leidzeklim, stuosta Juoņs Kuzminskis, atbolstu izadevs sajimt ari nu vītejuo uzjiemieja. Aktirim par fiļmiešonūs nikas nateikūt moksuots, i tāli kinā byus pītyvynuoti tam, kaids kotrs cylvāks ir dzeivē. Jaunajā latgalīšu lentē varēs redzēt grupys “Metrs” dalinīkus Uldi Ruļuku, Guntaru Šembeli, Andreju Zelču i Edmundu Tamani, Valdi Vucānu nu “Bez PVN”, Kasparu Čaksti nu “Oranžās brīvdienas”, grupys “Gandreiž 10nīkā”dalinīkus Juoni Kuzminski, Imantu Zagorski, Vitāliju Grišunovu i Aiju Kuzminsku. Jaunajā kinā varēs redzēt ari Nauri Konovalovu nu “Unknown Artist”, kai ari Ingaru Gusānu i Mareku Gusānu, Valteru Murānu, filmēsīs TV personeibys – ChaulaTV vadietuojs Eriks Saksons i žurnaliste Evika Muizniece. Planavuots, ka aktiru saimei ar laiku pīsavīnuos vēļ cyti muziki, kinys veiduotuoju draugi, pazinis i vītejī īdzeivuotuoji.

Fiļmiešonys process jau ir suocīs, bet vysvaira tiks fiļmāts augusta vydā. Kinys aktualitatem i uzjimšonys procesam leidza var sekuot vītnē facebook.com/komedija.lombards.

Kai soka pots idejis autors: “Itei ir internacionaluokuo kina kaida uzjimta Latvejā. Komedejā varēs dzierdēt dažaidys volūdys – latgalīšu, latvīšu literarū, angļu, vuocu, krīvu, ukraiņu, ari latiņu.” Kinys veiduotuoji nūruoda, ka prīcuosīs par sevkuru atbolstu, kas paleidzēs kinai tapt.

Publicitatis karteitis.

Drukavuot