Latgolys žurnals “A12” ar jaunom rubrikom pieteis pīrūbežu i cīmu stuostus

Latgolys žurnals “A12” ar jaunom rubrikom pieteis pīrūbežu i cīmu stuostus

Rokstu sagataveja: portals lakuga.lv

Ituo goda augustā leidz ar 36. numera izīšonu sešu godu pastuoviešonys svātkus sviņ žurnals par Latgolu “A12”. Septeitū darbeibys godu žurnals uzsuoc ar div jaunom rubrikom – stuostu serejā “Cilvēks un ciems” tiks pieteiti gon plaukstūšī, gon izmierstūšī Latgolys cīmi, bet “Robežlīnijas” vess iz Igaunejis i Sūmejis nūmalem Krīvejis pīrūbežā, kab maklātu īspiejis i vylktu paralelis ar Latgolys situaceju.

Žurnals “A12” rodīs 2012. godā Rēzeknē, i tys viestej par cylvāku celim i nūtikšonom leluokūtīs Latgolā – ap šoseju A12 nu Jākubpiļs leidz Latvejis Austrumu rūbežam. Žurnals izīt 6 reizis godā, 2018. goda augustā svynūt jau 37. numura izdūšonu. Kotrā žurnala numerī skaiteituoji teik vasti gon iz dažaidom Latgolys vītom, gon aicynuoti intervejuos īpazeit latgalīšus i ar Latgolu saisteitus cylvākus, taipoš bīži viņ caur latgalīšu acim teik īpazeitys ari cytys vaļsts.

Žurnalā daīmama informaceja par Latgolys muokslys telpā nūteikūšajom izstuodem, viesteits par jaunuokajim izdavumim i muzykys īrokstim latgaliski. Žurnala stuostūs teik izcaltys Latgolys vierteibys, rūsynojūt runuot par pozitivajom puormaiņom.

Jaunuokajā žurnala numerī stuosti aizvad iz Kruoslovys nūvoda Indru i tī itūvosor atkluotū Laimis muzeju, Pušys azara krostā atdzymstūšū Babru muižu, Rēzekne–Daugovpiļs šosejis molā īpazeitajom lūgu mežginem, Lūznovys pogosta Zosnys legendom, kai ari Viļānu nūvoda Sokolku pagostu ar tuo izatukšuošonys liktini. Taipoš jaunuokuo žurnala puslopuos var satikt izcyluo liduotuoja Jezupa Baško mozdālu Jezupu Baško Trešū, Bolvu uzjiemiejus Lailu i Ivaru Saides, treis Kruoslovys nūvoda pogostu puorvaļdneicu Ēriku Gabrusāni, dirigenti Ruotu Salmiņu i Stiernīnis varganisti i kulturys dzeivis dvieseli Īvu Zepu.

Paplašynojūt žurnala rubrikys, turpmuokajūs četrūs “A12” numerūs tiks pīduovuots īpazeit Latgolys cīmu stuostus i dzeivi Krīvejis pīrūbežūs cytuos vaļstīs. Rubrikā “Robežlīnijas” tiks analizāta situaceja i maklāti rysynuojumi iz Igaunejis i Sūmejis pīmāra Krīvejis pīrūbežā – kai aktivizēt socialekonomiku, pīsaisteit cylvākus, vīnlaiceigi saglobojūt eipašu kulturtelpu vaļsts nūmalēs, bet rubrikā “Cilvēks un ciems” īpazeistynuos gon ar Latgolys cīmim, kuri atsateista, gon ar taišni pretiejim – izmierstūšim pīmārim. Jaunuos rubrikys žurnala puslopuos tūp Latvejis vaļsts budžeta finansātys mierķprogramys “Reģionālo un vietējo mediju atbalsta programma” apakšprogramā “Atbalsts sabiedriski nozīmīgas žurnālistikas radīšanai medijos Latgales plānošanas reģionā”.

Publicitatis karteite.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]