Roksta autors: portals lakuga.lv

30. augustā Myusdīnu muokslys galerejā Leivuonā nūtiks paneļdiskuseja “Latgale 101”, tuos mierkis ir aktualizēt vaicuojumu par Latgolys kulturtelpys atteisteibu nuokūtnē.

Latvejis symtgadis svineibu i ari Latgolys kongresa symtgadis svineibu 2017. godā ītvorūs  lels uzsvors teik lykts iz tradiceju pieteišonu, saglobuošonu, nūdūšonu nuokušajom paaudzem, bet mozuok uzmaneibys teik veļteits myusdīnu jaunradis procesim Latgolā, nūruoda diskusejis organizatori.

Kaidi izaicynuojumi Latgolys kulturtelpu sagaida nuokūtnē, kai spēsim tai pīsalāguot, kai maineisīs kulturys pasuokumu auditorejis praseibys? Kaidi izaicynuojumi sagaida pošvaļdeibys Latvejis regionūs pi aizviņ saryukūšuo dzeivuotuoju skaita, kaida ītekme ir regionalajom kulturys institucejom i kaidys ir tūs jaunuos formys? Atbiļdis iz itim vaicuojumim tiks maklātys kūpeigā diskusejā ar dalinīkim – Latgolys regiona muokslinīkim, kulturys darbinīkim, bīdreibu i pošvaļdeibu puorstuovim.

Nu 29. augusta leidz 1.septembram Leivuonūs nūtiks jau trešais Myusdīnu muokslys galerejis festivals, kas apvīnoj muokslys, muzykys i izgleitojūšus pasuokumus ar devizi “Latgale 101”. Festivala mierkis ir veicynuot jaunradis procesus Latgolys kulturtelpā i profesionaluos myusdīnu muokslys pīejameibu plošuokai sabīdreibai Latgolys regionā. Kai īrosts, vysi pasuokumi festivala ītvorūs – izstuodis, koncerti, diskusejis i meistardarbneicys – byus pīejami bez moksys.