Īsvieteis dzejneicys Bronislavys Martuževys dzejis klieti

Īsvieteis dzejneicys Bronislavys Martuževys dzejis klieti

Roksta autors: portals lakuga.lv

Svātdiņ, 26. augustā, Lubuonys nūvoda Indrānu pogosta “Dārziņu” sātā īsvieteis dzejneicys Bronislavys Martuževys (1924 – 2012) pīmiņai izveiduotū dzejis klieti. Pasuokumu kuplynuos folklorys kūpu i kapellu sasadzīduošona i sasaspieliešona.

Bronislava Martuževa i juos atstuotais literarais montuojums ir zeimeigs na tikai Latgolai, bet vysai Latvejai. Jei beja nacionaluos pretuošonuos kusteibys dalineica i atbaļsteituoja. Padūmu vara Bronislavu izsyuteja iz Sibiri, kur jei pīcus godus pavadeja smogā dorbā, piec atsagrīzšonys ilgi i vairuokys reizis uorstējēs slimneicuos i sanatorejuos. Padūmu Latvejis izdevnīceibys atsasaceja izdūt politīslūdzeituos Martuževys dzejūļus, partū pyrmuos divejis gruomotys “Balta puķe ezerā” i “Rakstītāja” tyka izdūtys ar radineicys Evys Mārtužys vuordu. Vāluok tyka izdūti deveni Bronislavys Martuževys dzejūļu kruojumi i divejis izlasis. Bronislava bejuse ari tautys teicieja, poša saceriejuse dzīsmem i vuordus, i meļdeņus.

Itūšaļt “Broņislavas Martuževas fonds “Rakstītāja”” struodoj pi dzejneicys pīminis saglobuošonys, atjaunojūt klieti juos pādejā dzeivisvītā, i tymā īreikojūt pīminis vītu. Projekta ītvorūs tykuse restaurāta ari B. Martuževys muotis pyura skreine.

 

26. augustā, dzejneicys vuorda dīnā, pasuokums “Dārziņu” sātā suoksīs 15.00 stuņdēs ar Bronislavys dīnys īskandynuošonu, folklorys kūpu i kapellu sasadzīduošonu i sasaspieliešonu, izpyldūt B. Martuževys dzīsmis. 16.00 nūtiks izsūle i zīduojumu vuokšona dzejis klietei, bet 16.30 nūtiks dzejis kliets īsvieteibys, pīsadolūt prīsterim Andrejam Kazakevičam i Rihardam Rasnacim. Pasuokumā pīsadaleis Bierzpiļs folklorys kūpa “Saivenis”, folklorys kūpa “Lubāna”, Lubānys lauku kapela “Meldiņš”, Lubānys jauktais vokalais ansambļs “Naktsputni”, Meirānu tradiceju kūpa “Sietiņš”, Mikelis Gruzītis, režisors Valdis Lūriņš, Latvejis Nacionaluo teatra aktrise Dace Bonāte, Andris Baltacis i solistu apvīneiba “Jubilāri”, Latvejis Ordiņu bruoleiba.

Par Bronislavys Martuževys dzeivis gaitom i atstuotū montuojumu stuosta “Broņislavas Martuževas fonda “Rakstītāja”” vadeituoja Anna Egliena Latvejis Radejis raidejumā “Kolnasāta”.


 Publicitatis karteite.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]