Roksta autors: portals lakuga.lv

Viesturnīks i publicists Mikeļs Bukšs dzims 1912. goda 1. junī Škilbanu pogosta Plešovys cīmā zemnīku Oduma i Madalis Bukšu saimē. 1913. godā saime puorsacēle iz Baļtinovys pogostu. Mikeļs vuicejuos Surikovys četrklaseigajā pamatškolā, Baļtinovys sešklaseigajā pamatškolā i Rēzeknis Vaļsts gimnazejā. Gimnazejis godūs jis publicēja rokstus, apskotus i cytus informativus materialus dažaidūs presis izdavumūs, pīsapeļneja ar privatstuņžu pasnīgšonu. Gimnazejis godūs Mikeļs Bukšs īsapazyna ar latgalīšu sabīdryskajim darbinīkim Nikodemu Rancānu, Franci Kempu, Ontonu Rupaini.

Piec gimnazejis beigšonys M. Bukšs struoduoja par leidzstruodīnku gazetā “Latgolys Vords” i īsastuoja Latvejis Universitatis Filologejis i filozofejis fakultatis Klasiskuos filologejis nūdaļā. 1938. godā Bukšs universitati pabeidze, īgiustūt filologejis magistra gradu par disertaceju “Antikuos pasauļa motivi latvīšu tautys puosokuos”. 30. godu beiguos i 40. godu suokumā jis struoduoja par latiņu i latvīšu volūdys školuotuoju Aglyunys, Daugovpiļs i Rēzeknis gimnazejuos. Nu 1942. leidz 1944. godam beja Rēzeknis Vaļsts gimnazejis direktors. Vuocu okupacejis laikā īsasaisteja demokratiskajā pretesteibys kusteibā – Latvejis Centralajā padūmē.

1944. godā kūpā ar saimi M. Bukšs devēs biegļu gaituos iz Zvīdreju. Tī jis struoduoja Stokholmys Statistikys puorvaļdē, Vermlandis muzejā, bibliotekā, arhivā i breivajā laikā pieteja Latgolys kulturviesturi. Zvīdrejā aktivi īsasaisteja i dorbuojuos trimdys latgalīšu politiskajuos i sabīdryskajuos organizacejuos. Vadeja Zvīdrejis Latvīšu katuoļu bīdreibu, dorbuojuos “Andriva Jūrdža fondā”, “Latgaļu izdevnīceibā”, “Latgolys demokratu savīneibā”, “Latgaļu pietnīceibys institutā” i cytur. Mikeļs Bukšs vadeja ari trimdys latgalīšu žurnalu “Dzeive”, bejs izdeviejs i redaktors rokstu kruojumam “Acta Latgalica”. Daudzi rakstejs trimdys latgalīša presis izdavumūs. Mirs 1977. goda 8. junī Stokholmā i paglobuots Hāgys katuoļu kopūs.