Roksta autors: portals lakuga.lv

Sastdiņ, 8. septembrī, sūpluok asūšī i bejušī škaunīši, tyveji i tuoleji gosti teik aicynuoti iz pasuokumu “Marijai Andžānei – 110”.

Pasuokums īsasuoks 13.00 stuņdēs ar Sv. Mišu i koncertu “Sapynu zeme” (uzastuos dzīduotuoja Evita Zālīte-Grosa i gitariste Ilze Grunte) Landskoronys bazneicā. Turpynuojumā paradzāta pīminis šaļts literatis Marijis Andžānis dzymtajā Maču solā. Tī varēs nūsavērt ari Rykovys etnografiskuo ansambļa insceniejuma “Krystobys” fragmentu. 15.30 stuņdēs suoksīs dzejis i prozys lasejumi Škaunis Tautys nomā, kur pīsadaleis Inga Ābele, Ineta Atpile-Jugane, Līvija Liepdruviete, Ilze Sperga, Meldra Gailāne, Karonhisake, Sandra Ūdre, Anita Mileika, Sovvaļnīks, kai ari folklorys kūpys “Gaiļupeite” i “Olūteni”. Nu 17.00 stuņžu varēs apsavērt dzejneicai veļteitū ekspoziceju i īsaklauseit škaunīšu atmiņu stuostūs.

Koč i vysūs informacejis olūtūs atrūnama informaceja, ka latgalīšu literate Marija Andžāne dzymuse 1909. goda 8. septembrī, bazneicu metriku gruomotuos atrostuo informaceja līcynoj, ka juos eistais dzimšonys datums ir 1908. goda 8. septembris (piec vacuo stila). Partū ari itūgod teik svieteits itys opolais jubilejs.

Marija Andžāne ir vīna nu īvāruojamuokajom latgalīšu rakstneicom, kura sovu darbeibu plaši izpauduse i Latvejis Republikys laikā 20. gs. 20. i 30. godūs, i ari vāluok trymdā. Pādejī juos dorbi izguojuši jau piec rakstneicys nuovis – Ilgys Šuplinskys sakuortuotais dzejis kruojums “Dimensiju kvadrātsakne” 1999. godā i Ilonys Salcevičys sakuortuotais stuostu kruojums “Puisāns ar kozu” 1996. godā.

Rakstneica Marija Andžāne nu dzeivis atsavadeja 1988. goda Zīmyssvātku ūtrajā dīnā Elmīrā, Ņujorkys štatā ASV, juos myužs ir bejs ražeigs, i jei latgalīšu literaturā ir atstuojuse īvāruojamu literarū montuojumu. Trymdā M. Andžāne raksteja i presē publicejuos obejuos latvīšu rokstu volūdys tradicejuos, nu, dzeivojūt Latvejā, jei raksteja tik latgaliski.