Rokstu sagataveja: portals lakuga.lv

2018. goda 11. septembrī nu 11.00 leidz 15.20 Rēzeknis nūvoda Lūznovys muižā byus Latvejis vaļsts symtgadis nūtikšonys “Regionu dīnys” aktivitatis “Latvejis ainovu duorgumi vakar, šudiņ, reitu” regionaluo diskuseja.

Nu 2017. goda juņa kai Latgolys, tai vysys Latvejis īdzeivuotuoji tyka aicynuoti dasaceit sova regiona ainovys-vierteibys aktivitatē “Latvejis ainovu duorgumi”, taipat par ainovu duorgumim tyka vuoktys viesturiskuos fotokarteitis, stuosti i līceibys. Nu 193 suokuma dasacejumu par desmit Latgolys ainovu duorgumim tyka atzeiti: Aglyunys bazilikys ainova, Daugovys lūku ainova, Daugovpiļs cītūkšņa ainova, Latgolys krysti lauku ainovā, Ludzys piļsātys ainova ar azarim i piļsdrupom, Lūznovys muižys ainova, Muokūnkolna apleicīnis ainova, Rāznys azara ainova, Svātuo Dominika Pasīnis Ruomys katuoļu bazneicys ainova i Zylupis senlejis ainova.

Regionalajā diskusejā 11. septembrī tiks raudzeits atbiļdēt iz vaicuojumim par ainovu duorgumu nūdūšonu tuoļuokajom paaudzem. Diskusejai teik gataveiti ari eipaši stuosti – par krystim Zīmeļlatgolys ainovā stuosteis Bolvu centraluos bibliotekys vadeituoja Ruta Cibule, kai ari plašuoki stuosti byus par Daugovpiļs cītūksni, kas sajiems ari Eiropys Padūmis Ainovu bolvu, Kruoslovys piļs kompleksu i Iudiņa turisma atteisteibys centru “Bāka” pi Lubuona azara.

Leidza ar diskuseju muižā tiks atkluota Latgolys regiona ainovu duorgumu izstuode, kas Lūznovys muižys Boltajā zalē byus apsaverama nu 10. septembra da 1. oktobra. Izstuodē īkļautys kai vysu desmit Latgolys ainovu duorgumu fotokarteitis, tai i viesturiskuos biļdis nu īdzeivuotuoju, muzeju i Latvejis Nacionaluos bibliotekus kruojumu. Piečuok nu 26. oktobra ar vysu Latvejis regionu 50 ainovu duorgumu izstuodi varēs īsapazeit Latvejis Nacionalajā bibliotekā. Biļdis, stuosti i cyta informaceja byus apsaverami i tiks globuoti ari elektroniskajā duorgumu kruotivē ainavudargumi.lv.

Diskusejis reikuotuoji iz sasatikšonu aicynoj Latgolys regiona īdzeivuotuojus, īprīšk dasokūt pīsadaleišonu, rokstūt pasts@lpr.gov.lv. Smolkuoka diskusejis programa ITE.

Karteitis nu lakuga.lv arhiva.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzeklim.