Jaunā raidejumā runuos par latgalīšu Millenium paaudzi

Jaunā raidejumā runuos par latgalīšu Millenium paaudzi

Rokstu sagataveja: portals lakuga.lv piec “Dautkom TV” snāgtuos informacejis

Jaunā televizejis raidejumā “Latgaliešu Millenium paaudze diasporā: kādai jābūt Latgalei, kurā atgriezties?” meklēs atbiļdis iz vaicuojumu, kaidu Latveju gryb redzēt mileniāļu paaudze, kas byus nūteicieji pasaulī jau tyvuokajā nuokūtnē, kai jī redz i uztver Latveju i Latgolu, i cik daudz latgaliskais jim nūzeimoj?

Raidejumā “Latgaliešu Millenium paaudze diasporā: kādai jābūt Latgalei, kurā atgriezties?” pamatfokuss lykts iz uorzemēs dzeivojūšajim jaunīšim nu Latgolys, kas jau ilgstūši dzeivoj uorpus dzymtuos vītys, i jūs vīdūkļa nūskaidruošonu par Latgolys kasdīnys problemom, kas ītekmiejušys jūs lāmumus par dūšanūs iz uorzemem. Nūskaidruots tiks ari, voi diasporys latgalīši turpynoj runuot latgaliski, voi teik sekuots leidza situacejai gon dzymtajā pusē, gon vaļstī kūpumā, taidā veidā atkluojūt Millenium paaudzis eipatneibys i tū, voi itai paaudzei ir svareigi atsagrīzt sovā vaļstī i vēļ vaira – dzymtajā nūvodā.

Pīcu godu laikā Latgola ir zaudiejuse 30 000 īdzeivuotuoju. Videjuos olgys ir vyszamuokuos, saleidzynojūt ar cytim regionim. Ekonomiskī ruodeituoji ir treis reizis zamuoki nakai Reigā, kurys atteisteibā saleidzynojūši vēļ jūprūjom teik īguļdeiti miļzeigi leidzekli, narunojūt par dzeivis leimini, kaids ir uorzemēs. Svareigi nūskaidruot, voi latgaliskuo kultura i patriotisma sajiuta ir vīna nu Millenium paaudzi raksturojūšu īzeimu.

 

Jaunīši, tai sauoktuo Millenium paaudze, ir cylvāki, kas, verūtīs nu Latvejis viesturis pozicejis, ir dzymuši i uzauguši plaisā, puorejis pūsmā nu Padūmu Savīneibys iz Eiropu, strauji atsateistūt tehnologejom, informacejis telpai i uzskotu breiveibai. Latvīši dzeivoj uorzemēs jau nu pyrmuo leluo emigracejis viļņa vaira kai godsymtu atpakaļ – X paaudze, kurai beja svareiga patriotisma i pīdereibys sajiuta, ir izveiduojuse latvīšu meitnis zemēs gon bārnu duorzus, gon školys, gon interešu puļceņus. Uorzemēs teik saglobuota latgalīšu volūda i kūptys latvīšu tradicejis, teik svieteita Juoņa dīna i 18. novembrī aizdazynuota sveceite, tūmār tuos ir cytys paaudzis izveiduotys i saglobuotys tradicejis, kas Millenium paaudzē izzyud. Na viņ lobuokys dzeivis mekliejumi ir īmeslis tik daudzu jaunīšu aizceļuošonai nu vaļsts – varbyut īmeslis teišom ir meklejams Millenium paaudzis cytaidajā pasauļa uztverē. I, ka tai ir, tod svareigi ir atbiļdēt iz vaicuojumu, kaidu Latveju gryb redzēt mileniaļu paaudze, kas byus nūteicieji pasaulī jau tyvuokajā nuokūtnē? Kai jī redz i uztver Latveju i Latgolu, i cik daudz latgaliskais jim nūzeimoj? Iz itūs vaicuojumu atbiļdis raudzeis rast raidejumā “Latgaliešu Millenium paaudze diasporā: kādai jābūt Latgalei, kurā atgriezties?”. Pyrmais raidejums 23. septembrī 21.30 stuņdēs kanalā “Dautkom TV” i 22.00 stuņdēs kanalā “Re:TV”.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.

Print Friendly, PDF & Email

Nūtikšonu kalendars