Latgaliskys aktivitatis “Zynuotnīku naktī” Rēzeknē

Latgaliskys aktivitatis “Zynuotnīku naktī” Rēzeknē

Roksta autors: portals lakuga.lv

28. septembrī 18.00 stuņdēs Rēzeknis Tehnologeju akademejā 10. reizi nūtiks “Zynuotnīku nakts”, itūgod pasuokuma tema ir “Zynuotne veidoj myus”, tymā naizpaliks ari latgalīšu volūdys populariziešona.

“Zynuotnīku naktī” eipaši gaida vyspuorizgleitojušūs školu pedagogus, nu 18.00 leidz 20.00 byus seminars “”Mozais priņcs” i kompeteņču pīeeja: skaitom, riekinojam, zeimejam, leidzpuordzeivuojam, izzynom, eksperimentejom…”. Tū vadeis prof. Ilga Šuplinska (filologeja) i Pāvels Cacivkins (iņženirzynuotnis).

Antuana de Sent Ekziperī gruomotys “Mozais priņcs” latgaliskais tulkuojums izguoja ituo goda aprelī, tū iz latgalīšu volūdu tulkuojuse Evika Muizniece, literaruos redaktoris – Ilga Šuplinska i Maruta Latkovska. Seminarā interaktivā veidā varēs puorsalīcynuot par ituos gruomotys efektivitati jaunajā izgleiteibys satura reformā. Paraleli mozuokī bārni kūpā ar autorim varēs skaiteit vīnu nu jaunuokūs bārnu gruomotu latgaliski “Meikuleņš īpazeist omotus”.

Sovukuort 18. i 20. stuņdēs varēs nūsavērt kinu “Latgalīši Pīterpilī”. Kina stuosta par Latgolys nacionaluos atmūdys darbinīkim 20. godu symta suokuos Krīvejis imperejis golvyspiļsātā Sanktpīterburgā aba Pīterpilī. Tiks atkluotys atmūdys kusteibys darbinīku gaitys i dorbi, stuosteits par latgalīšim, kuri beja nūzeimeigi vysys imperejis leiminī, par optiskuo telegrafa lineju, kas škārsuoja vysu Latgolys teritoreju, par pyrmajim viļcīnim, kas Latgolā ībrauca nu Pīterpiļs.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.

Print Friendly, PDF & Email

Nūtikšonu kalendars