Roksta autori: Ināra Groce, Inga Čekša-Ratniece, Māris Justs, žurnals “A12”

 
Vīna nu Latgolys ainovys atškireiguokūs īzeimu ir lauku kūka vīnsātys, greznuotys ar kūkgrīzumim lūgūs i lūgu sliedžim. Laukim izatukšojūt, ari sātys aizīt nabyuteibā leidz ar viesturis montuojumu i eipašū, kotrys sātys stuostu. Sātys ir kai rūbežlinejis storp paguotni i nuokūtni. Lai ituos rūbežlinejis apjaustu, žurnala „A12“ radūšuo komanda ceļoj pa Latgolys šosejom, apsastuojūt pi kūka guļbyuvem i izzynojūt kūkgrīzumu viesturiskū rasšonuos stuostu.

Sevkuram ceļa pūsmam kūka sātu greznojumu tradicejis ir nadaudz atškireigys. Dagdys i Ezernīku apleicīnē sātom ir vīnkuoršuoki, elegantuoki kūkgrīzumi, ākys parosti ir zemis bryunajūs tūņūs. Dīvamžāļ, nūpierkūt zemi, jaunī saiminīki sātu palaiž nabyuteibā, kai tys nūteik ar symts godus vacajim “Vertulim” ceļa pūsmā nu Dagdys iz Ondrupini.

Sūpluok vaira kai symts godus vacajūs “Uzuleņūs” vēļ teik kūptys puču dūbis i stateits duorzs, saimineica Janina pīzeist, ka sāta dzeivoj leidza ar cylvāku. Sātys saimineica Janina te ir atguojuse pi veira saimis i jau kūpā sātā nūdzeivuoti 58 godi. Sātu uzturēt paleidz Amerikā dzeivojūšais dāls, nūstyprynuoti pamati, puormyurāti cepli. Uzulenim izteiksmeigys i proporcionalys viesturiskuo lūga konstrukcejis, kū radejušys īprīškejuos paaudzis laikā, kod nabeja juoskrīn, beja laiks sagataveit i izalaseit kvalitativu materialu. Kvarbatkys ir rūku dorbs, i kū vacuoks lūgs, tū jiutama pamateiguoka pīeja.

Arhitekts Pēteris Blūms: soka “Tom kvarbatkom ir cīš lela nūzeime, partū ka tys ir eipašais, uorkuorteigi specifiskais, kur acs pīstuoj pyrmuos. Tuos apmaleitis cīš bīži ir kruosuotys. Tei ir atškireiguo detaļa i zeime daudzūs gadejumūs, kas vīnu sātu atškir nu cytys sātys. Ari Krīvejā juos masveideigi pagaist. Lelā mārā juos ir pagaisynuojušys autografu nūzeimi, cylvāki vaira juos nalītoj kai kodu, formulu grafiskū zeimi sātys aizsardzeibai. Senejuokuo jāga – vydā beja ītvartys vysaidys zeimis, kuru mierkis beja pasorguot sātu, taipat kai ar kreitu pīraksteitajam iz durovu.”

Roksts sagataveits sadarbeibā ar portalu lakuga.lv ar Vaļsts regionaluos atteisteibys agenturys finansialu atbolstu nu Latvejis budžeta līdzekļu projekta “Robežlīnijas” ītvarūs.