Roksta autors: portals lakuga.lv

Nu 10. oktobra trešdīnēs 19 stuņdēs Dautkom TV i nu 11. oktobra catūrtdīnēs 17.30 Re:TV kanālā varēs vērtīs jaunu, unikalu raidejumu latgalīšu volūdā “Laika leigučuos”, informej tuo veiduotuoji Latgolys entuziastu grupa “Biļdis”, atkluojūt ari vuorda “leigučys” nūzeimi latvīšu literarajā volūdā – “šūpoles”.

Jaunajā raidejumā viesteis par Latgolu, suocūt nu Latvejis naatkareibys atjaunuošonys leidz pat myusu dīnom, analizejūt i saleidzynojūt viesturiskajūs videomaterialūs attāluotū ar situaceju šudiņ, veidojūt Latgolys spylgtuokūs personeibu kulturā i politikā portretus, īsaverūt Latgolys kulturtelpys aktualitatēs.

Raidejums veiduots par gūdu Latvejis vaļsts symtgadei, styprynojūt pīdereibu Latvejis vaļstei i ceļūt latgaliskū pošapziņu. “Laika leigučuos” veiduos treis rubrikys – “Viesturis olūtā”, “Latgolai nūzeimeiga personeiba” i “Latgolys kulturtelpys aktualitatis”.

Raidejums “Laika leigučuos” taps ar Vaļsts regionaluos atteisteibys agenturys mierkprogramys “Regionalūs i vītejūs medeju atbolsta programa” apakšprogramys “Atbolsts sabīdriski nūzeimeigys žurnalistikys radeišonai medejūs Latgolys planavuošonys regionā” atbolstu. Ar raidejuma tematiku varēs īsapazeit regionalajā gazetā “Latgales Vietējā Avīze”, radejā “Ef- Ei” skanēs raidejuma “Laika leigučuos” radejis verseja.

Pyrmā raidejumā stuosteis par Latvejis Republikys rūbeža atteisteibu nu 90. godu, raidejuma veiduotuoji gasteis Grebnevys rūbežkontrolis punktā, pi ilggadejuo sabīdriskuo i kulturys darbinīka Pītera Keiša, diskutēs par 2017. godā Latgolys kongresa symtgadē pījimtū rezoluceju.

Karteite: publicitatis foto.