Jaunā TV raidejumā izzynuos Vuorkovys nūslāpumus

Jaunā TV raidejumā izzynuos Vuorkovys nūslāpumus

Rokstu sagataveja: portals lakuga.lv

Sastdiņ, 13. oktobrī, TV pyrmizruodi pīdzeivuoja jauns raidejums, dokumentals TV serials “Tas notika šeit”, kurymā treis viesturnīki rauga izzynuot i atkluot pīcu Latvejis vītu stuostus i nūslāpumus. 20. oktobra raidejumā byus stuosts par Vuorkovu.

Dokumentalais serials “Tas notika šeit” taiseits kinu studejā “Mistrus Media”, sagaidūt Latvejis vaļsts symtgadi. Kotrā nu pīcu sereju treis dīnuos treis viesturnīki atkluoj treis unikalus stuostus par kaidu mozuok zynomu Latvejis vītu – Limbažu nūvoda Viļkeni, Vuorkovys nūvoda Vuorkovu, Prīkulis nūvoda Gramzdu, Keguma nūvoda Birzgali i Talsu nūvoda Stendi. Treis dīnys viesturnīki pietej i rauga stuostus izzynuot, bet trešuos dīnys vokorā ar stuostim īpazeistynoj vītejūs ļauds, kurī bolsoj par kaidu nu stuostu i tuo vuordā teik nūsaukta kaida eipaša vīta cīmā voi piļsātā. 20. oktobra raidejumā Vuorkovā viesturnīki Edgars Plētiens, Inna Gīle i Gatis Krūmiņš kūpā ar raidejuma vadeituoju Dāvidu Ernštreitu raudzeis izzynuot, kurs vītejīs miļjonars planavuoja Vuorkovā izceļt dzeļžaceļu, kur pagaisuse padūmu nūkrytusei lidmašine i kaidu Ūtruo pasauļa kara mīlesteibys stuostu.

Studejis “Mistrus Media” producents Gints Grūbe soka, ka ar jaunū dokumentalū serialu rauga dasaisteit viereibu vītu viesturei i regionu viesturei. “Tas notika šeit” īdviesme giuta nu Zvīdrejis sabīdryskuos televizejis raidejumu, kas ļaun daudzom vītom atkluot legendys, interesantus stuostus i dasaisteit apmaklātuojus seņ aizmierstom vītom. Žurnalists un raidejuma vadeituojs Dāvids Ernštreits stuosta, ka ituos vysys ir najauši izvālātuos vītys, kas da šam nav bejušys ceļuotuoju golvonī golamierki, bet varbyut piec symta godu otkon kaids raudzeis puorbaudeit atkluotūs stuostus i saprast, aiz kuo parks, ceļš voi īla nūsaukta taidā vuordā, kaidu sajieme “Tas notika šeit” fiļmiešonys laikā.

“Tas notika šeit” nūsaverams LTV1 sastdīnem 21.25, bet dokumentaluo seriala nūtikšonom leidza var sekuot socialuo teikla Facebook lopā https://www.facebook.com/tasnotikaseit/.


 

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.

Print Friendly, PDF & Email