Rokstu sagataveja: portals lakuga.lv

Producentu grupa “Lietišķā Latgale” vaļsts symtgadis laiku pīduovoj pavadeit kūpā ar latgalīšu dzejnīkim i literatim, īsaverūt eipašā virtualā “Latgolys aiļu i prozys skreinē”. Tamā itūšaļt daīmams vaira par 100 latgalīšu dzejis i prozys dorbu.

Voldemārs Voguls, Dagnija Dudarjonoka, Valentīns Lukaševičs, Anna Rancāne, Ineta Atpile-Jugane, Oskars Seiksts, Jana Skrivļa-Čevere, Līvija Liepdruviete, Meldra Gailāne i citi pavysam 15 vysaidu paaudžu latgalīšu dzejnīki i literati “Latgolys aiļu i prozys skreinē” īlykuši nazcik sovu dorbu, kas nu sevkuram dzejis mīļuotuojam daīmami, nūsaklausūt sev ārtā laikā škārsteiklā. Vysi dorbi teik skaiteiti latgaliski, taipat nazcik nu pīduovuotūs ir jaunlasejumi – pyrma nikur napublicāti dorbi.

Producentu grupa “Lietišķā Latgale” ar itū projektu grib pīgrīzt viereibu latgalīšu volūdai, latgalīšu dzejai i prozai, tū popularizejūt ari multimedialā formā. “Latgolys aiļu i prozys skreinē” sevkurs dzejis mīļuotuojs varēs sovu īcīneitū literatu īraudzeit vaigā i īsaklauseit kai literarais dorbs skaņ poša autora bolsā, tempā i interpretacejā.

Pošu autoru skaiteituos latgaliskuos dzejis ailis i prozys tekstus sevkurs interesents turpmuok varēs atrast, īsaverūt producentu grupys “Lietišķā Latgale” youtube.com ci facebook.com kanalūs.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.