Roksta autore: Ināra Groce, žurnals “A12”

“Es Latvijā”– taids moto ir 16. novembrī atkluotajai Latgolys muokslinīku rudiņa izstuodei. Tema ļuove autorim byut breivim izvēlē i atspūguļuot muokslys dorbā sabīdreibā vysod aktualū vaicuojumu – kas maņ pošam ir svareigs, dzeivojūt sovā vaļstī, kaidys sajiutys es grybu izsaceit muokslys volūdā, kū izceļt i akceņtēt. Tys izstuodē atsakluoj i gleznuos, i muola veiduojumūs, i tekstilā i jauktajuos tehnikuos.

Kasgadejā rudiņa izstuode ir Latgolys muokslinīku atskaitis punkts – te ir varams vīnuvīt redzēt lobuokūs muokslys dorbus i interesantuokūs veikumus goda grīzumā. Itūgod izstuodē pīsadola 67 muokslinīki, sūpluok labi pazeistamajim akvarelistim Elgai i Vladislavam Paurim, profesora Osvalda Zvejsalnieka kruosu prīcai, Māra Čačkys punktu meditacejai ir ari jaunuoku autori dorbi – Anastasijis Bikovys redziejums par divejim, šaļteņa Grietys Butjankovys gleznuos. Filozofiskuos puordūmuos ir atainuota globalizaceja, dorbūs ir interpretaceja par pacifikaceju, veiduotys medaļu i muola trauku kompozicejis par gūdu Latvejis symtgadei. Tok vysplašuok Latveja teik uztvarta i atainuota dobā – saulis rītūs, maja guņs zīdūs, klusuma spaituojumā, iudiņa atuorūs i zīdu plašumūs. Izstuode Latgolys kulturviesturis muzejā ir apsaverama da 15. decembra.

Roksts sagataveits sadarbeibā ar portalu lakuga.lv ar Vaļsts regionaluos atteisteibys agenturys finansialu atbolstu nu Latvejis budžeta leidzekļu projektā “Robežlīnijas”.

Drukavuot