Kai pareizi pīraksteit mienešu nūsaukumus?

Kai pareizi pīraksteit mienešu nūsaukumus?

Roksta autors: portals lakuga.lv

“Tāvam divpadsmit dālu. Sevkuram dālam vuords.” Itaidu meikli 1928. godā Bierzpiļs pogostā sovulaik pīrakstejs tūlaik škoļnīks, piečuok jurists Stanislavs Apšenīks. Pareizuo atbiļde tai i ir – mienešu nūsaukumi. Latgaliski mienešu nūsaukumu raksteiba mejusēs leidza ar laiku, bet kai tod pareizi mienešu nūsaukumus roksta myusu dīnuos?

Nu suoka drupeit īpasazeišonys ar mienešu raksteibu vaira nikai godsymta garumā. Sovulaik bazneicys gruomotuos i laiceigajūs kalendarūs (dažaiduos vītuos lītuotī vuordi ari: kalenders, kalinders, kolenders) raksteiti senejī mienešu nūsaukumi, par pīmāru, apreļs kai sulu mieness, nu leidza ar laiku pasamejuse ari mienešu raksteiba. Fraņča Kempa sastateitajā, Rēzeknē izdūtajā “Latwyskajā kalendarā “Daugawa” 1910 godam” mienešu apzeimiejumi raksteiti kai myusu laikūs zynomajūs nūsaukumūs, tai i senejūs: janwars (Jaungoda mènesis), februars (swacaines mènesis), marts (pawasara mènesis), aprilis (sulu mènesis), majis (lopu mènesis), junijs (wosoras mènesis), julijs (sìna mènesis), augusts (labibas mènesis), septembris (rudenia mènesis), oktobris (leita mènesis), nowembris (solnas mènesis), decembris (zìmas mènesis).


Daugawa. Latwyskajs kalendars 1910. godam

Vīns nu zynomuokūs latgaliskūs kalendaru ir Andryva Jūrdža “Myužeigais kalinders” (Myužeygays kalinders) (pyrmais saraksteitais 1907. godā, myusu dīnuos pazeistamais, plotuokais – 1916. godā), kurymā mieneši raksteiti itai: janwars, febrals, marca meness, aprels, mays, junia meness, jula meness, augusta meness, sentebra meness, oktebra meness, nowembra meness, decembra meness. 1933. godā izdūtajā Pītera Stroda “Pareizraksteibas vōrdneicā” mieneši raksteiti: janvars, februars, marts, apriļs, majs, junijs, julijs, augusts, septembris, oktobris, novembris, decembris. Taipat dažaidūs izdavumūs i olūtūs (eipaši latgaliski drukavuotajūs presis izdavumūs) atrūnomi ari cyti mienešu raksteibys pīmāri februarim, oktobrim, novembrim i decembrim. Sovulaik raksteiti ari: febraļs, oktebris (i okcebris), nojabris, dekabris.

Myusu dīnuos latgaliski mienešus pīroksta (pīmāri ar senejim nūsaukumim): janvars (Jauna goda mieness), februars (sveču mieness), marts (pavasara mieness), apreļs (sulu mieness), majs (lopu mieness), juņs (vosorys mieness), juļs (sīna mieness), augusts (labeibys mieness), septembris (rudiņa mieness), oktobris (leita mieness), novembris (solnys mieness), decembris (zīmys mieness) (raksteiba baļsteita 2014. godā izguojušuos Jura Cybuļa i Lidejis Leikumys pyrmuos digitaluos ābecis “Skreineite” sastateituos dorba būrtneicys “Skreineite. Vuicūs raksteit” (autors Jurs Cybuļs) pīmārūs).

Mienešu nūsaukumus myusu dīnuos latgaliski roksta: janvars, februars, marts, apreļs, majs, juņs, juļs, augusts, septembris, oktobris, novembris, decembris.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.

Print Friendly, PDF & Email

Kalenders

Jul
18
Cat
14:00 Bolvu nūvoda svātki @ Bolvi
Bolvu nūvoda svātki @ Bolvi
Jul 18 @ 14:00 – Jul 20 @ 23:45
Bolvu nūvoda svātki @ Bolvi
16:00 Storptautyskuos rezidencis nūslā... @ Rotko muzejs
Storptautyskuos rezidencis nūslā... @ Rotko muzejs
Jul 18 @ 16:00 – 17:30
18. julī 16.00 stuņdēs Rotko muzeja konferenču zālē nūtiks storptautyskuos rezidencis nūslāguma izstuodis atkluošona.   Nedelis garumā, nu 12. da 19. juļa Eiropys Savīneibys finansātuo projekta “Eiropas kultūra: Visi dažādi – visi vienlīdzīgi” laikā Rotko[...]