Roksta autors: portals lakuga.lv

Kab veicynuotu myusdīneigu latgalīšu kulturys populariziešonu, latgalīšu ziņu portals lakuga.lv atteistejs darbeibu, izveidojūt lītuotuojim ārtuoku i modernuoku portalu, kai ari atpazeistameibai rodūt jaunu logotipu. “Latgalīšu kulturys ziņu portals lakuga.lv” vēl aizviņ ir vīneigais medejs pasaulī, kura saturs ir tikai latgalīšu rokstu volūdā.

Portals lakuga.lv dorbojās jau nu 2007. gods, niu jau vaira nakai desmit godu kas dīnys latgalīšu rokstu volūdā viestejūt par Latgolys i latgaliskuos kulturys aktualitatem, pīduovojūt iņtervejis ar sabīdreibā zynomim latgalīšim, skaidrojūt latgalīšu volūdys problemvaicuojumus, kai ari atkluojūt regiona viesturi i sovpateibys. Goda laikā portalā teik publicātys vaira nakai 500 jaunys viests, aptverūt plašys i dažaidys latgalīšu kulturys temys – muzyku, literaturu, volūdu, religeju, viesturi, muokslu, tradicejis, cylvākus i izklaidi. Sūpluok vizualajom puorvierteibom puormainis pīdzeivuojuse ari portala struktura – temys palykušys precizuokys i detalizātuokys, ļaunūt mudruok i koncentrātuok atrast kotram interesejušū latgalīšu kulturys aktualitati ci vaicuojumu.

Par vajadzeibu atteisteit portalu tuo redaktore Vineta Vilcāne soka:

“Latgaliskais ir laikmeteigs, tys nav relikveja, kas nūglobuota babys skreinē, latgalīšu volūda aizviņ vaira pasaruoda publiskajā vidē, ari škārsteiklā. Aizviņ vaira cylvāku medejus skaita caur mobilajim telefonim i planšetem, gribiejom, kab lakuga.lv ir ārta lītuošonai ari caur itom īreicem.”

Leidz ar sātyslopys puorveidi portalam niu ir jauna vizualuo ideņtitate, pozicionejūt latgaliskū kai naatjamamu daļu nu Latvejis i pasauļa kulturtelpys, kas atsakluoj portala jaunajā logo. Jaunū portala vizualizaceju veiduojs programātuojs Juoņs Rancāns, bet logo autore ir dizainere Inese Krivmane. Jaunuo sātyslopa izveiduota ar projektu konkursā “Latvijas valsts mežu un Valsts kultūrkapitāla fonda atbalstītā Latgales kultūras programma 2018” sajimtū leidzfinansiejumu.

Portala eipašnīks ir bīdreiba “Latgolys Studentu centrs”, “Latgalīšu kulturys ziņu portala lakuga.lv” saturs itūšaļt teik sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.

Lakuga.lv nav tikai ziņu portals, bet ari latgaliskūs iniciativu rūsynuotuojs i atbaļsteituojs – jau ūtrū godu sadarbeibā ar Latvejis Radejis Latgolys studeju reikuots Pasauļa diktats latgalīšu volūdā, regulari teik organizāti latgalīšu rokstu volūdys apvuiceibu seminari, portals ir vīns nu golvonūs Latgolys viestnīceibys GORS sadarbeibys partneru i informativūs atbaļsteituoju Latgalīšu kulturys goda bolvys “Boņuks” reikuošonā.

Portala aktualitatem i latgalīšu kulturys jaunumim leidza var sekuot na tikai lakuga.lv, bet ari socialajā teiklā Facebook facebook.com/lakuga.lv i Instagram instagram.com/voluuda.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.