Rokstu sagataveja: portals lakuga.lv

1983. godā dybynuotuo ārtroka apvīneiba “Elpa”, svietejūt 35. pastuoviešonys godadīnu, izdavuse jaunu singlu “Es nebēgšu”.

“Daugovpiļs rokgrupa “Elpa” jau nu pošu pyrmsuokumu beja spylgta nūtikšona Latvejis popularuos muzykys jūmā. “Elpai” ir palīkūša i byutiska vīta Latvejis muzykā, tei ītekmiejuse daudzus rodūšuos muzykys ansambļus, i itei ītekme nav pagaisuse ari šudiņ,” par apvīneibu stuosta komponists Mārtiņš Brauns.

Sovukuort muzikologe Daiga Mazvērsīte par “Elpu” soka: “Itei naparostuo komanda vysod izacāluse ar orginalitati sovūs prīšknasumūs. “Elpys” dzīsmem rakstureigi sarežgeiti ritmi i aranžiejumi, balansejūt storp akademiskū izteiksmi i rokmuzyku. Leidz ar tū grupys klauseituoju vydā bejušs tī ļauds, kuri nu muzykys gaida kū vaira par izklaidi.”

Jaunuos dzīsmis muzykys autors ir Valdis Rundzāns, tekstu sarakstejuse Laura Bicāne. Nu 2015. gada grupys “Elpa” sastuovu veidoj Atis Ieviņš (vokals), Valdis Rundzāns (basgitara), Artūrs Pribilovs (gitara), Māris Elksnis (tausteņinstrumenti) i Jurijs Čekušins (sytamī instrumenti), itūgod grupai pīsavīnuojs Vilnis Krieviņš (sytamī instrumenti). Jaunū singlu produciejs Gatis Zakis, kas kūpā ar grupu struoduojs pi divom dzīsmem – “Es nebēgšu” ir pyrmuo nu tūs.

Singls “Es nebēgšu” pīejams “Spotify”, “iTunes”, “Deezer” i cytuos digitalajuos muzykys platformuos. Grupu var ari atbaļsteit Latvejis Radejis 2 latvīšu rok i popdzīšmu aptaujā “Muzikālā banka” i nūdūt bolsu par jaunū singlu lr2.lsm.lv/lv/lr2/raidijumi/muzikala-banka.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.