Rokstu sagataveja: portals lakuga.lv

Zīmys saulgrīži gon seņuok, gon myusu dīnuos ir zeimeigs atskaitis punkts. Itys ir magisks laiks, kod dzymst breinumi, pīsapylda vieliešonuos, Zīmyssvātku laikā seņuok zeilēja nuokūtni i styngri ticēja tam, ka paradzātais pīsapiļdeis. Portals lakuga.lv apkūpuojs Zīmyssvātku laika zababonus, kotrs pats var paraudzeit, cik lela daļa patīseibys ir seņču gudreibuos.

Zīmyssvātku zababoni, kab lūbtūs

Kas pyrmais pīsaceļs Zīmyssvātku reitā, tys vysu godu īs pyrmais ar dorbim prīškā.
Kab naudys nikod natryuktu, tod Zīmyssvātkūs nadreikst vysu naudu izdūt.
Zīmyssvātkūs vajaga devenis reizis ēst, tod byusi boguots.
Kab byutu daudz naudys, tod Zīmyssvātku vokorā malns kačs juonas ap bazneicu.
Ka kas īspiej Zīmyssvātku vokorā, piertī izapiers, plyks īskrīt duorzā i pakrateit uobeļneicu, tod jei tymā godā byus pylna ar uobelim.

Tuoļuokuo paredziešonai

Kod Zīmyssvātku naktī īt iz krystcelim, tod var dabuot vysu zynuot, kas nuokušu godu nūtiks.
Ka cylvāks gryb zynuot sovu nuokūtni, tod vajag Zīmyssvātku naktī apīt ap sovu sātu treis reizis i piec tam vērtīs lūgā, tī varēs redzēt nuokūtni.
Dadzynoj papeiru i verās ānys siluetu, piec tuo nūsoka – kū gaideit.

Preceibu paredziešonai

Ka Zīmyssvātku nakti vērtīs atspriekleņ caur kuojom ceplī, tod sovu izradzātū var redzēt.
Zīmyssvātkūs, egleiti dadzynojūt, vajaga kotram īsadūmuot sovu sveceiti; kura nu īdūmuotūs sveceišu pyrmuo izdag, tam pyrmam byus juosaprec.
Zīmyssvātkūs meitom juobaroj suņs i tod juopalaiž pa vaļai; iz kuru pusi suņs skrīs, iz tū pusi meitu nūvess tautuos.
Kūču dīnys vokorā napracātim vajaga pagruobt molkys kliepi, atnest iz ustobu i saskaiteit pagalis, ka izīt pa puoram, tod tymā godā precēsīs, bet, ka nav puora, tod nasaprecēs.
Zīmyssvātku vokoru meitys nūsasāst ar mugoru pret durovom i svīž kūrpi puor placu. Kurys kūrpis purņs truopej durovuos, tei tiks izpracāta.
Zīmyssvātku vokoru meitys saber kotra sev prīškā sauvi mīžu i nūlīk gaili vydā: pi kurys gaiļs īt mīžu āstu, tei tiks izpracāta.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.