Roksta autors: Inga Čekša-Ratniece

Izaruoda, ka suomi ir vīni nu leluokūs kopeja dzāruoju. Pīmāram, vīnā nu kopeja ražuotuoju informacejis olūtu saceits, ka videji suoms izdzer pīcys kopeja taseitis dīnā, turpretim Latvejis īdzeivuotuojs nu vīnys da treju. Teik pīmynāts, ka vīns suoms videji godā izbauda 13 kilogramus kopeja. Tys ass saisteits ar Suomejis tymsajim vokorim i garuoku zīmys periodu, taidā syltā veidā kompensejūt tū. Ari viesturiski suomim byudamim zvīdru i cariskuos Krīvejis imperejis pakļauteibā, tyka īvīstys nu Rītumu puorjimtuos kopeja dzeršonys tradicejis. Žurnala “A12” radūšuo grupa puorsalīcynuoja, ka Suomejā puorsvarā ir nūpierkams kopejs ar ūtruos pakuopis grauzdiejumu, kur ir vaira kofeina. Puskilograma īpakuojumā jis ir lātuoks kai Latvejā, koč ari itamā Zīmeļvaļstī puortyka ir duorga. Izaruoda, ka iz Suomeju kravys kudžūs kopejs konteinerūs teik vasts nu juo izceļsmis vaļsts, tuoļuok tys pa sauszemi teik Krīvejā, kur ir kopeja grauzdātova. Tai suomi ir lapni, byudami vīnā nu kopeja ceļa pūsmu.

Sylts kopejs, kai jau vysā pasaulī, ir daīmams mozuos i leluos kopejneicuos, restoranūs, kopeja automatūs pat iz īlys. Dagvīlys uzpiļdis stacejuos pierciejs pats jū var īlīt krūzeitē, dalīkūt papeirā īpakuotu cukri, pīnu ci kriejumu. Ka par stypru, kluot dalej iudiņa. Bez kopeja nav īdūmojamys ari sarunys oficialā i breivā gaisūtnē. Kuorteiga suoma sātā ci dorbavītā vysod ir kopeja kruojumi, ka nu atīt nagaideits, bet jauks gosts. Nu jau vaira kai pyrma goda, prūti, 2017. gods 5. decembrī, atzeimejūt Suomejis Naatkareibys dīnu i symtgadi, suomi praseja sovys vaļsts dzimšonys dīnu vysā pasaulī svinēt kūpā ar jim, sātā dzarūt aromatisku kopeju.

Roksts sagataveits ar Vidis regionaluos atteisteibys agenturys finansialu atbolstu nu Latvejis budžeta leidzekļu projekta “Sabiedrības un reģionu robežlīnijas žurnālā A12”.