Roksta autors: Inga Čekša-Ratniece, žurnals “A12”

Ānu dīnys sevkuru godu uzrunoj ap 50 tyukstūšom školānu, jamuos pīsadolūts vairuok kai 1500 ānu devieju. Pārņ vysleluokuo interese nu jaunīšu pusis beja par uorstim, datorprogramātuojim i radejis diktorim.

Kai ir nūvāruojuši Ānu dīnu reikuotuoji, ituos profesejis viereibys centrā ir nazcik godus. Lela interese ir par dorbu pošvaļdeibu dūmēs, ari iz Saeimu Ānu dīnā guojieju natryukst. Itūgod jaunīši ānuos 13. februarī. I jau ir pādejais laiks izalaseit, kurp dūtīs ānuot, ka ir taida gribiešona. Latvejis austrumu pīrūbeža Ludzā uzrunuotī školāni pīzyna, ka planavoj ānuot ci pi policistu i guņsdziesieju, ci dūtīs iz vītejū pošvaļdeibu, nazcik ir nūlāmuši itamā dīnā apmeklēt rūbežsardzi. Juosoka, ka pīrūbeža jaunīši piec vydsškolys absolviešonys lobu pruotu izalosa vuiceitīs rūbežsardzis koledžā, partū ka piec juos beigšonys teik nūdrūsynuots dorbs i olga, tai sev garantejūt stabilitati. Izviertejūt Ānu dīnys lītdereigumu, jaunīši tū pīzyna par vajadzeigu i saistūšu pasuokumu, partū ka na veļti, juos mierkis ir veicynuot školānūs interesi par realom profesejom, kab mierķtīceigi planavuotu sovu nuokūtnis karjeru. Sovutīs dorba devieji popularizej sovus uzjāmumus, īstuodis i pīpraseituokuos profesejs.

Saskaņā ar D. Supera profesionaluos izvēlis teoreju, par karjerys īspiejom juosuoc aktivi dūmuot jau nu 14 godu vacuma, kod veidojās saprasšona par sovom interesem, prasmem i vierteibom. Jaunīts suoc vairuok dūmuot i analizēt, attīcynojūt iz sevi i sovom gribiešonom.

Īsaverūt Ānu dīnys portalā www.enudiena.lv, vēļ ir breivys vakaņcis ānuošonai Vaļsts rūbežsardzis Viļakys puorvaļdē, Bolvu nūvoda pošvaļdeibā i puors uzjāmumūs. Puorejuos Latgolys piļsātuos ānuošonai breivu vītu vaira nav.

Roksts sagataveits ar Vidis regionaluos atteisteibys agenturys finansialu atbolstu nu Latvejis budžeta leidzekļu projektam “Sabiedrības un reģionu robežlīnijas žurnālā A12”.