Sagataveja: Inga Čekša-Ratniece, žurnals “A12”

Jau tradicionali kotru godu Latgolys piļsātā, ari dažūs pogostūs teik reikuoti muokslinīku pleneri. Tai šaļtenis Latgolā teik giutys na viņ fotografejuos, bet ari, muokslinīkam dorbojūtīs ar ūtom i kruosom, gleznuos.

Latgola gleznuos īmyužynuota tyka ari pyrma 100 godu. “Gleznainuos Latgolys apdzejuotuojs kruosuos” – tai tyka saukts vīns nu popularuokūs gleznuotuoju – Vitālijs Kalvāns. Pošam muokslinīkam liktiņs beja atvieliejs 54 ražeigus dzeivis i dailradis godus. Nūzeimeiguokī muzeji lapnojās ar vysai apjūmeigom gleznuotuoja dorbu kolekcejom, kas bīži ari pīduovuotys skateituojam. Pastuoveiga ekspoziceja izveiduota Rēzeknis Muokslys nomā.

Muokslys zynuotneica Irēna Vilčuka stuosta, ka muokslinīku V. Kalvānu saistejuse vysod maineigais gaismys i kruosu pasauļs, kuru meistars tulkuojs sovā tālu, dūmu i jiutu pasaulī. Realuos dzeivis i nu juos izrītūšuo muokslys patīseiba bejuse V. Kalvāna radūšuos darbeibys saturs i mierkis. Juo dailradis izaugsme ir naatjamama tei ceļa daļa, kuru 20. g. s. pyrmajā pusē nūstaiguojuse latvīšu gleznīceiba.

Kai zynoms, latvīšu ainovys izveidē i izkūpšonā golvonī nūpalni pīdar Vilhelmam Purvītim. Jis radeja na viņ tipisku vyspuorynuotu Latvejis ainovys tālu, bet ari izveiduoja Latvejis ainovyas gleznīceibys školu, kurys spūžs puorstuovs ir V. Kalvāns. “Muokslinīks, bolstūtīs iz Purvīša latvīšu gleznīceibys īdybynuotuojim ainovu gleznīceibys priņcipim, radejs lirisku, sovā byuteibā harmonisku dobys tālu, kurymā vyss atsarūn saskaņā i leidzsvorā,” – tai muokslys zynuotneica I. Vilčuka. Muokslinīks atraiseiti i vīgli gleznuojs nūvoda, palaikam ari puornūvoda dobys styureišus ar iudinim, lauku sātom, zīdūšim suodim, sīna kaudzem, rudzu stotim, klusom mežmolom, vysaidi variādams dobā giutū nūskaņu boguoteibu. Dorbūs redzim i labeibys vuociejus, i buļbu raciejus, i sīna gruobiejus. Sūpluok ainovai i žanriskajai ainovai, nūzeimeigu vītu muokslinīka radūšajā darbeibā ījēme portrets.

V. Kalvānu var raksturuot kai jiuteigu latvyskuos ainovys puorstuovi, sovpateigu i spūdru sovā kruosainajā pasauļa redziejumā. Par V. Kalvānu stuosta ari gruomota, kurys autore I. Vilčuka apkūpuojuse muokslinīka dzeivis stuostu, laika bīdru atmiņuos, juo darbeibu i davumu muokslys pasauļam. Tekstu sekmeigi papyldynoj malnboltys i kruosainys fotografejis: svareigys šaļtenis nu muokslinīka dzeivis i dailradis, kai ari gleznu fotoreprodukcejis.

Roksts sagataveits ar Vidis regionaluos atteisteibys agenturys finansialu atbolstu nu Latvejis budžeta leidzekļu projektam “Sabiedrības un reģionu robežlīnijas žurnālā A12”.

Drukavuot