Ludzā nūtiks diskuseja par medeju saturu latgaliski

Ludzā nūtiks diskuseja par medeju saturu latgaliski

Roksta autors: portals lakuga.lv

24. janvarī 10 stuņdēs Ludzys piļsātys golvonajā bibliotēkā nūtiks diskuseja “Medeju saturs latgaliski – cik tys svareigi?”. Ar sovu pīredzi daleisīs “Latgalīšu kulturys ziņu portala lakuga.lv” i Latvejis Radejis Latgolys studejis puorstuovi.

Pādejūs godūs medejūs arviņ vaira pasaruoda saturs latgalīšu volūdā. Tū lelā mārā veicynoj mierķprogramys, kuruos var sajimt finansiejumu satura veiduošonai latgalīšu volūdā, kai ari pošu latgalīšu entuziasms. Paraleli tam latgalīšu volūda arviņ vaira dzieržama sabīdriskajūs medejūs – Latvejis Televizejā i Latvejis Radejā. Latgalīšu sabīdriskuos organizacejis aicynuojušys sabīdriskajūs medejūs palelynuot saturu latgalīšu rokstu volūdā, sasnādzūt 10% nu kūpejuo raidlaika.

Cik svareigs medeju saturs latgaliski ruodīs pošim latgalīšim, kas ruodīs saistūšuoks i kū grybātūs nuokūtnē, ar kaidom gryuteibom i izaicynuojumim juosasaskar žurnalistim, veidojūt saturu latgaliski? Atbiļdis iz itim vaicuojumim tiks maklātys diskusejā “Medeju saturs latgaliski – cik tys svareigi?”.

Diskuseju organizej “Latgalīšu kulturys ziņu portals lakuga.lv” sadarbeibā ar Ludzys biblioteku. Ar sovu pīredzi i redzīni daleisīs portala lakuga.lv redaktore Vineta Vilcāne. Portals lakuga.lv itūšaļt ir vīneigais medejs Latvejā i pasaulē, kura saturs ir tikai latgalīšu rokstu volūdā. Sovukuort Latvejis Radejis Latgolys studeju puorstuovēs tuos vadeituoja Renāte Lazdiņa. Studeja veidoj vairuokus dažaidom mierķauditorejom dūmuotus raidejumus latgalīšu volūdā, kai ari sižetus, kuri skaņ kūpejā Latvejis Radejis ziņu plyusmā.

Diskusejā aicynuoti pīsadaleit gon medeju puorstuovi, gon sevkurs interesents. Tei nūtiks 24. janvarī 10 stuņdēs Ludzys piļsātys golvonuos bibliotekys Bārnu nūdalis (Ludza, Stacejis īla 41) 3. stuovā.

Portals lakuga.lv dorbojās nu 2007. goda, kasdīnys latgalīšu rokstu volūdā viestejūt par Latgolys i latgaliskuos kulturys dzeivis aktualitatem. Portala eipašnīks ir bīdreiba “Latgolys Studentu centrs”, lakuga.lv saturs itūšaļt teik sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]