Roksta autors: apkūpuoja Ināra Volkova, žurnals “A12”

Muoksla meklej i izaicynoj sabīdreibys vuojuos vītys, aktualizej patīseibys, aizdavuma i īškejuos vīndabeibys kluotbyušonu muokslā. Muoksla ir tei, kas ar muokslinīka dasadyurīni i meistareibu īsaļdej skaistu ci nagleitu patīseibys breidi. Tuos ir vysaiduos patīseibys sejis, daudzveideiba i unikalitate, kas atsakluoj Latvejis i uorvaļstu muokslinīku dorbūs. Pamatvierteiba muokslā – aizdavums, kuru rysynuot, palīkūt uzticeigam izkūptajam rūkrokstam i tehnikys nūsaceitajim priņcipim, kūpūt i nūdūdūt tradicejis nuokušajom paaudzem muokslā, napagaisynojūt jaunekleigumu i ironejis davu eksperimentūs.

Viņ sev saprūtamajā lītu pasaulī rodūt i stuostūt, 21. godu symta kulturtelpā īīmam sevkurs ar sovu īkšejū vīndabeibu. Jei apvīnoj aizdavumu i definej kotra individualū patīseibu muokslā. Izstuožu sezonā, kas apmaklātuojim daīmama nu 1. februara da 14. apreļa, varēs apsavērt Intys Celminis i Edvarda Grūbis izstuodi “Gaismys i tymsys spēlis”, Kinejis muokslinīka Vonga Šedžuna izstuodi “Īškejuo vīndabeiba”, boltkrīvu akvarelista Aleksandra Karpana izstuodi “Šaļtenis”, Oļģerta Kraukļa izstuodi “Arhitektura gleznīceibā”. Pašminys muokslys galereja nu Vuocejis Rotko centra apmaklātuojim pīduovoj 15 pasauļa muokslinīku pasavierīni par temu “Skaistums ir patīseiba, patīseiba ir skaistums”. Muokslinīki nu Rumanejis Ovidiu Leuče, Delija Maksima i muokslineica nu Turcejis Pinara Baklana Onala skateituojim pīduovoj kūpeigu izstuodi “Gunī”, kas tapuse tepat Daugovpiļs cītūksnī muokslys rezideņču ītvarūs.

Pīktdiņ, 1. februarī, 16.00 stuņdēs Daugovpiļs Marka Rotko muokslys centrā 2019. gods pyrmuos izstuožu sezonys atkluošona.

Roksts sagataveits ar Vidis regionaluos atteisteibys agenturys finansialu atbolstu nu Latvejis budžeta leidzekļu projektam “Sabiedrības un reģionu robežlīnijas žurnālā A12”.