Apkūpuoja: Inga Čekša-Ratniece, žurnals “A12”

Centraluos statistikys puorvaļde publiskuoja paziņuojumu, ka 2017. godā Latvejā nabadzeibys riskam beja pakļauti 446 tyukstūšys aba 23,3% īdzeivuotuoju, kas ir vaira par 1,2% kai 2016. godā. Vysvaira nabadzeibys riskam pakļautūs cylvāku dzeivoj Latgolā – 44,2%, kas tyvojās gondreiž pusei nu regiona īdzeivuotuoju.

Satraucūši, ka kūpumā Latvejā vysnabadzeiguokī ļauds ir piec 65 godu vacuma – 49%. Vacu cylvāku viers 65 godim vairuok ir taišni Latgolā. Piec Centraluos statistikys puorvaļdis datu 2017. godā jī beja 21,7%. Ka Latvejā videjais vacums ir 42,2 godi, tod Latgolā – 44,3 godi. Vysjaunuokī ir Pīreigā – 40,6 godi. Reigā i juos apleicīnē ir vysleluokuo dzimsteiba, bet Latgolā ir vīni nu zamuokūs ruodeituoju: 2017. godā pīdzyma 2301 bārnuks. Izskaitļojūt procentuali, tys sastuoda 11% nu vysu jaundzymušūs. Verūtīs piec dzymuma, Latgolys regionā par 63 zānu ir vaira kai daiļuo dzymuma puorstuovu. Juodasoka, ka vysmozuok mozūs pasaulī dzymst Vydzemē.

Tok Latgolys regionā ir vīns nu leluokūs eipatsvoru dorbspiejis vacumā, prūti, 62%, tymā pošā laikā saskaņā ar Nūdarbynuoteibys vaļsts agenturys datim 2018. gods 31. decembrī Latgolā bez dorba beja 14,7% nu dorbspiejeigūs īdzeivuotuoju, kas ir vysaugstuokais ruodeituojs vaļstī. Latvejā kūpumā beja 6,4% bezdarbnīku.

Saskaņā ar Centraluos statistikys puorvaļdis informaceju, ka videjī īnuokumi Latvejis īdzeivuotuojim ir 728,20 euro mienesī, tod peņisonarim – 520,22 euro. Pīmynātais cipars nav ari ruodeituojs, partū ka vairums seniorim peņseja lobuokajā gadīnī ir drupeit puori 300 euro. Vysvaira peļnej Latvejis īdzeivuotuojs nu 25 da 44 godu vacuma. Saleidzynojūt ar puorejū Latveju, Latgolys īdzeivuotuojim ir vysmozuokuo mieneša videjuo dorba samoksa, respektivi, 2017. godā tī beja 640 euro pyrma nūdūkļu nūmoksys, tymā pošā laikā Reigā puorsnīdze vīnu tyukstūti euro. Regionā privatajā sektorā tei ir drupeit zamuoka kai sabīdryskajā, tys ir, 615 euro i 669 euro.

Procentuali vysvairuok naapmīrynuotū ar sova muojūkļa apstuoklim cylvāku ari ir Latgolā – 27,3%.

Roksts sagataveits ar Vidis regionaluos atteisteibys agenturys finansialu atbolstu nu Latvejis budžeta leidzekļu projekta “Sabiedrības un reģionu robežlīnijas žurnālā A12”.