Bīžuokuo klaida – leidzskaņa meikstynuošona navītā

Bīžuokuo klaida – leidzskaņa meikstynuošona navītā

Rokstu sagataveja: portals lakuga.lv

Latgalīšu rokstūs bīžuokuo klaida, ir meikstinuošona navītā. Saprūtams, ari ūtraiži – tī, kur vajadzātu pameikstynuot, tuo nav. Portals lakuga.lv pīduovoj eisu skaidruojumu, kas paleidzēs latgaliski raksteitgrybātuojim tū dareit lobuok.

Lykums ir cīš vīnkuoršs: e, ē, i, ī, ei, ie prīškā leidzskaņu burtus nameikstynoj, pīmāram, lepetnīks, vabalis, plēst, kapli, kugis, škiuņs, neit (svīstu), lieni.

Parkū tai? Izrunā tok meikstynuojumu dzierdim. Partū, ka, pīmāram, lejis latvīšim ir voi nu l, voi nu ļ, kai vuordūs ļipa (meiksts) i lelle (cīts). A latgalīšim ir treis l skanis, kai pīmāra vuordūs: ļauds, lele (½ ļ meikstuma i, e prīškā, volūdnīki tū sauc par palatalizaceju) i lobs.

Cytuos volūduos, pīmāram, lītuvīšu voi krīvu, palatalūs leidzskaņus ari nameikstynoj, tei ir vyspuoreja prakse, kas attīcynuota ari iz latgalīšu literarū volūdu.

Meikstynoj:

1) meikstu leidzskani a, ā, ai, au, o, u, ū, uo prīškā: ļauds, kņuobuot, sarkšņūs;
2) izkrytuša golūtnis i prīškā: bruoļs (< bruolis), cieļs (< cielis), sastdiņ (< sastdini);
3) tod, kod storp i, e i leidzskani storpā ir pusmeikstynuots (palatalizāts) leidzskaņs: Oņte, kuļdinīks (a kulda), biļde, sviļpe.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.

Print Friendly, PDF & Email