Rokstu sagataveja: portals lakuga.lv

Viļānu Muzykys i muokslys školys atbolsta bīdreiba izveiduojuse animacejis kinu latgalīšu volūdā “Vinnejs Pūks Viļānūs”. Itei ir jau trešuo animacejis kina, kū radejuši muokslys školys audzekni kūpā ar paleigim.

Sovu ceļu pi skateituoju animacejis kina suoce paguojušuo goda vosorā, kod par gūdu Latvejis symtgadei i Viļānu piļsātys 90 godu jubilejam tū prezeņtēja Viļānu Muzykys i muokslys školā. “Kinu nu suokuma da gola veiduoja poši viļānīši. Bārni i jaunīši zeimēja, kustynuoja, uzjēme kadrus, komponēja, apdarynuoja, atskaņuoja muzyku, īrunuoja i tulkuoja tekstus. Školuotuoji veiduoja scenareju, vadeja muokslys, animacejis, muzykys, runys, skanis apstruodis darbneicys, veice skanis i vizualūs materialu apstruodi i montažu,” par kinys tapšonys procesu stuosta Viļānu Muzykys i muokslys školys direktore Inta Brence.

“Vinnejs Pūks Viļānūs” ir jau trešuo animacejis kina latgalīšu volūdā, kū veiduojuši Viļānu Muzykys i muokslys školys audzekni. Pyrmais sūļs animacejis kinu žanrā beja kina “Biteit, munu zaltspuorneit!”. Tai sekuoja animacejis kina “Vasals, Vinnej Pūk!”, kurā ružovais Sivieneņš, luoceits Mikeleits i palāda Zole syuteja dzimšonys dīnys apsveikumu Vinnejam Pūkam. Bet jaunuokajā kinā Vinnejs Pūks ar gaisa balonu nu Anglejis atlidoj gostūs iz Viļānim. Sasateikūt vysim varūnim, atsakluoj, ka latgalīšu i angļu volūdai ir cīši daudzi leidzeibu, partū komunikaceja animacejis kinā nūteik obuos volūduos.

Inta Brence nūruoda, ka kina ir na viņ izklaidejūša, tok ari izgleitojūša. Kinā dzieržama latgalīšu i angļu volūdys saspēle, senejūs Latgolys tālu, simbolu i zeimu muokslinīcisks interpretiejums, rosti myusdīneigi rysynojumi latgalīšu orginalmuzykys skaniejumam, kai ari baudams talanteiguos latgalīšu dzejneicys Marejis Andžānis dzejūleiša “Vuškeņu saruna” muzykalais interpretiejums.

Veiduot kinu jaunīšim paleidziejuši Inta Brence, Dainis Poikāns, Maruta Latkovska, Jurs Ruļuks i Anita Volāne. Lelu atspaidu audiovizualūs dorbu radeišonā snāguse ari Viļānu Muzykys i muokslys školys atbolsta bīdreiba, kura 2017. godā Lauku atbolsta dīnesta LEADER projekta rezultatā nūpierkuse aparaturu i programaturu, kab školys audziekni ar školuotuojim poši varātum apstruoduot video i audio materialus.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.