“Boņuks” par myuža īguļdejumu muokslinīkam Osvaldam Zvejsalniekam
Rokstu sagataveja: portals lakuga.lv
Svātdiņ, 24. februarī, 11. reizi padūs Latgalīšu kulturys goda bolvys “Boņuks”, kur sūpluok pārnejuo gods svareiguokajom latgalīšu kulturys nūtikšonom, personom i aktivitatem ar bolvu par myuža īguļdejumu latgalīšu kulturys atteisteibā tiks gūdynuots muokslinīks Osvalds Zvejsalnieks.
Gleznuotuojs, školuotuojs i procesu vierzeituojs – tai var saceit par Osvaldu Zvejsalnieku. Dzims 1944. gods 21. martā Varakļuonūs, audzs Rēzeknis nūvoda Zvejsalās, bet nu jau vaira nikai 50 godus par sovu sātu sauc Rēzekni. 1971. godā beidzs Latvejis Muokslys akademeju (LMA), nu 1976. gods ir Latvejis Muokslinīku savīneibys bīdrs. Nu 1970. gods struodoj Rēzeknis lītišķuos muokslys vydškolā, itūšaļt ir Rēzeknis Muokslys i dizaina vydškolys direktors, LMA profesors. Osvalds Zvejsalnieks izstuodēs pīsadola nu 1971. gods, sareikuojs ap 20 personalizstuožu, regulari pīsadola plenerūs i grupu izstuodēs gon Latvejā, gon uorvaļstīs.
Pasasokūt Osvalda dorbam Rēzeknē ir vīna nu lobuokūs muokslys vydškolu Latvejā, nūdybynuota vīneiguo Latvejis Muokslys akademejis filiale uorpus Reigys, kas ir pamats vasalai muokslinīku paaudzei Latgolā, izveiduots Rēzeknis muokslys noms ar vīneigū pastuoveigū Latgolys muokslinīku dorbu ekspoziceju pasaulī.
Osvalds Zvejsalnieks ir pīminekļa “Vienoti Latvijai” (tautā saukta “Latgolys Muora”) atjaunuošonys dorbu vadeituojs, Latvejis atmūdys vierzeituojs Rēzeknē, Latgolā, i, prūtams, kūšū kruosu i boltūs bazneicu Latgola, kas īmyužynuota Osvalda glaznuos i paliks iz vysim laikim, ir tikai daļa nu juo veikuma, par kū pasasaceit.
